Fact Check: តើ​រូប​ថត​នេះ​​ជា​ទិដ្ឋ​ភាព​មូលដ្ឋាន​កង​ទ័ព​ចិន​នៅ​កម្ពុជា​មែន​ឬ​​?

False Political

ការ​ចោទ​ជាសំណួរ​ និង​ការ​អះអាង​ថា ​កម្ពុជា​បាន​អនុញ្ញាត​​ឱ្យ​​ចិន​​ដាក់​​មូល​ដ្ឋាន​​កង​ទ័ព​​នៅ​​លើ​​ទឹក​​ដី​​កម្ពុជា​នោះ​​ បាន​ក្លាយ​ជា​ប្រធាន​បទ​ជជែក​​ដេញ​ដោល​ និង​មាន​ការ​បញ្ចេញ​មតិ​ចម្រុះ​ពី​សំណាក់​អ្នក​ប្រើ​ប្រាស់​បណ្តាញ​សង្គម​នានា​ជាច្រើន​ ជា​ពិសេស​ក្រោយ​ពី​មាន​​ដំណើរ​ទស្សនកិច្ចរបស់​លោក​ស្រី​អនុ​រដ្ឋ​មន្រ្តី​ការ​បរទេស​អាមេរិក​មក​កាន់​ប្រទេស​កម្ពុជា​កាល​ពី​សប្តាហ៍​មុន​។​

ទន្ទឹម​គ្នា​​នេះ​ មាន​រូបថត​ពីរ​​សន្លឹក​​ដែល​បាន​បង្ហាញ​អំពី​ទិដ្ឋ​ភាព​រថគ្រោះជា​ច្រើន​គ្រឿង​​ រួម​ជាមួយ​ឧទ្ធម្ភាគចក្រ​យោធា​ដោត​ទង់​ជាតិ​កម្ពុជា​ និង​ចិន ​នៅ​ទី​តាំង​​មួយ​កន្លែង​​​ ត្រូវ​​បាន​​បង្ហោះ​​នៅ​លើ​​បណ្ដាញ​​សង្គម​​ជាមួយ​​នឹង​​ការអះ​អាង​​​ថា វា​​ជា​ទិដ្ឋ​ភាព​មូល​ដ្ឋាន​កង​ទ័ព​ចិន​​​នៅ​ក្នុងតំបន់​មូលដ្ឋាន​កង​ទ័ព​ជើង​ទឹក​​រាម​ ខេត្ត​ព្រះ​សីហនុ​​​។ ទោះ​​យ៉ាង​​ណា​​ ការ​​​ផ្ទៀង​​​ផ្ទាត់​​របស់​ Fact Crescendo Cambodia បាន​​បង្ហាញ​​ថា ​ការ​អះអាង​​​នេះ​ គឺ​​មិន​​ត្រឹម​​ត្រូវ​​​នោះ​​ឡើយ​។

ការ​អះ​អាង​លើ​បណ្តាញសង្គម

កាល​​ពី​​ថ្ងៃ​​ទី​​០៩​​​​​​​​ ខែ​​មិថុនា​​​ ឆ្នាំ​​២០២១​​កន្លង​​ទៅ​​​ថ្មី​ៗ​នេះ​​ ​​​មាន​អ្នក​​ប្រើ​ហ្វេស​ប៊ុក​​ម្នាក់​​ ​​​​​​បង្ហោះ​​រូប​​ថត​​ចំនួន​ពីរ​​សន្លឹក​​​​​​ បង្ហាញ​​អំពី​​ទិដ្ឋ​​ភាពកង​ទ័ព​ ​យាន​យន្ត​យោធា​​ ដោយ​ភា្ជប់​ជាមួយ​នឹង​ទង់​ជាតិ​ប្រទេស​កម្ពុជា​ និង​ប្រទេស​ចិន​​​​​​។ អ្នក​​ប្រើ​​ហ្វេស​ប៊ុក​​ដដែល​នេះ​ ក៏​បាន​បញ្ជាក់​អះ​អាង​ ​និង​អប​អរ​សាទរ​នៅ​ក្នុង​សារបង្ហោះ​របស់​ខ្លួន​ផង​ដែរ​ថា ប្រទេស​កម្ពុជា​យើង​មាន​វត្ត​មាន​មូល​ដ្ឋាន​កង​ទ័ព​ចិន​ហើយ​នៅ​កំពង់​ផែ​រាម​​​ ។​

រូប​ថត​​ជាមួយ​​សំណេរ​​នេះ​ត្រូវ​​បាន​​ចែក​​រំលែក​បន្ត​​ៗ​​គ្នា​​ជា​​ច្រើនដង​​​ រួម​​ជាមួយ​នឹង​​ការចុច​គាំទ្រ​ពី​សំណាក់​អ្នក​ប្រើ​ ហ្វេសប៊ុក​និយាយ​ភាសា​ខ្មែរ​​ផង​​ដែរ​។

រូប​​ភាព​​ផ្ដាម​​ចេញ​​ពី​​ប៉ុស្តិ៍​​របស់​​​អ្នក​​ប្រើ​ប្រាស់​​​ដែល​​បាន​​រៀប​រាប់​ជា​​ភាសា​​ខ្មែរ​​​ ដោយ​អម​ជាមួយ​នឹង​រូប​ថត​ថា​​ «សូម​ចូល​រួម​អប​អរ​សាទរ​ផង​/! មូល​ដ្ធាន​ទ័ព​ចិន​មាន​នៅ​ស្រុក​រំដួល​យេីង​ហេីយ​ ស្ថិត​នៅ​/! កំពុងផែ​ ​(រាម​) ខេត្ត​កោះកុង​/!​​​»។

Facebook Post | Archived Link

ការត្រួត​ពិនិត្យ​ការ​ពិត

Fact Crescendo Cambodia បាន​​ចាប់​ផ្តើម​​​​ត្រួត​​ពិនិត្យ​ និង​​​ផ្ទៀង​​ផ្ទាត់​​រូប​ថត​​​តាមរយៈ​​កម្មវិធី​ Google Reverse Image​ ​ដែល​នាំ​ឲ្យ​ទៅ​រក​ឃើញ​​ប្រភព​ដើម​នៃ​ទិដ្ឋ​​ភាពលំ​ហាត់សមយុទ្ធ​​យោធា​រវាង​កម្ពុជា​ និង​ចិន​ដែល​​​​មាន​​​ទម្រង់​​​ដូច​គ្នា​​ទាំង​ស្រុងនេះ​។

រូប​ថត​ដែល​មាន​ទម្រង់​ និង​សណ្ឋាន​ដូច​គ្នា​នេះ​​ ត្រូវ​បាន​រក​ឃើញ​នៅ​ក្នុង​គេហទំព័រសារព័ត៌​មាន​ Phnom Penh Post​ ​បាន​ចុះ​ផ្សព្វ​ផ្សាយ​តាំង​ពី​ថ្ងៃ​ទី​៣១​ ខែ​មិនា​ ឆ្នាំ​២០២០​មក​ម្ល៉េះ​។​ គេហទំព័រ​ដដែល​​​នេះ​​ ក៏​បាន​បញ្ជាក់​ផង​ដែរ​នៅ​ក្នុង​​សេច​ក្តី​រាយការណ៍​ព័ត៌​មាន​របស់​ខ្លួន​ថា រូបថត​នេះ ​បង្ហាញ​​ទិដ្ឋ​ភាព​លំហាត់​សម​យុទ្ធ​យោធា​លើក​ទី​៤​ រវាង​ប្រទេស​កម្ពុជា​ និង​ចិន​ ដែល​បាន​ធ្វើ​ឡើង​នៅ​ក្នុង​ខេត្ត​កំពត​។​

រូប​ភាព​ផ្ដាម​ចេញ​ពី​គេហទំព័រសារព័ត៌​មាន​ Phnom Penh Post​ បាន​សរសេរ​រៀប​រាប់​​​​ចំណង​ជើង​ជា​ភាសា​អង់​គ្លេស​​​ថា «Banh: Military drill leaves strong mark on cooperation​​» ឬ​បក​ប្រែ​ជា​ភាសា​ខ្មែរ​ថា​ «លោក​ ទៀ​ បាញ់​៖ សម​យុទ្ធ​យោធា​បន្សល់​ទុក​នូវ​ចំណុច​ខ្លាំង​លើ​កិច្ច​សហ​ប្រតិ​បត្តិការ​»​។

Phnom Penh Post Report | Archived Link

ទំព័រ​ហ្វេស​ប៊ុក​ផ្លូវ​ការ​របស់​លោក​ ទៀ​ ​បាញ់​ ​​​បង្ហោះ​កាល​ពី​ថ្ងៃ​ទី​០២​ ខែ​មេសា​ ឆ្នាំ​២០២០​នេះ​ ក៏​បាន​បង្ហាញ​អំពី​ទិដ្ឋ​ភាព​ដូច​គ្នា​ទៅ​នឹង​រូបថត​ដែល​អ្នក​ប្រើ​ប្រាស់​បាន​អះ​អាង​ខាង​លើផង​ដែរ​។​ លោក​បាន​ចូល​រួម​​ក្នុង​ការ​បិទ​សម​យុទ្ធ​នាគ​មាស​ឆ្នាំ​២០២០​ កម្ពុជា​ និង​ចិន​ ដែល​ធ្វើ​ឡើង​នៅ​ក្នុង​ស្រុក​​​ជុំគីរី​​ ខេត្ត​​កំពត។​

រូប​ភាព​​ផ្ដាម​​ចេញ​​ពី​​ប៉ុស្តិ៍​​របស់​​ទំព័រ​​ហ្វេស​ប៊ុក​​លោក​រដ្ឋ​មន្រ្តី​ក្រសួង​ការពារ​ជាតិ​នោះ​ បាន​រៀប​រាប់​​ថា​ «ទិដ្ឋ​ភាព​​នៅ​​ព្រឹក​ថ្ងៃ​​ទី​៣០​​ ខែ​មីនា​​ ឆ្នាំ​​២០២០​​ ខ្ញុំ​​បាន​ចូល​រួម​​ជា​អធិបតី​​ក្នុង​​ពិធី​​បិទ​​សម​យុទ្ធ​​នាគ​មាស​២០២០​​ កម្ពុជា​​-​ចិន​ ដោយ​​មានការ​ចូល​រួម​ពី​​ ឯកឧត្តម​​ វ៉ាង​​ វិន​ធាន​​ (Wang Wen Tian)​ ឯក​អគ្គ​រដ្ឋ​ទូត​​ចិន​​ប្រចាំ​​​កម្ពុជា​​ នៅ​ស្រុក​​ជុំគីរី​​ ខេត្ត​​កំពត​​ នា​ពេល​កន្លង​មក​​​»។

Facebook Link | Archived Link

តាម​រយៈ​សេចក្តី​រាយការណ៍​នៅ​ក្នុង​គេហ​ទំព័រ​សារ​ព័ត៌​មាន​អន្តរ​ជាតិ​មួយ​​ New Straits Times Report  ​បាន​ចុះ​ផ្សាយផង​ដែរ​ទាក់​ទង​ទៅ​នឹង​ការ​ច្រាន​ចោល​របស់​លោក​នាយក​រដ្ឋ​មន្ត្រី​កម្ពុជា​ លោក​ ហ៊ុន​ សែន​ អំពី​ព័ត៌​មាន​ដែល​បាន​ចោទ​ថា​កម្ពុជា​មាន​វត្ត​មាន​មូល​ដ្ឋាន​កង​ទ័ព​ចិន​នៅ​ក្នុង​ដែន​សមុទ្រ​រាម​ ខេត្ត​ព្រះ​សីហនុ​ ​​កាល​ពី​​ខែ​ឧសភា​​​ ឆ្នាំ​២០២០​​​កន្លង​មក​នេះ។​

នៅ​ក្នុងសេចក្តី​រាយការណ៍​មួយនេះ​ ក៏​បាន​លើក​ឡើងជា​ភាសា​អង់​គ្លេស​ដែរ​ថា​​ «Prime Minister Hun Sen said the government would not allow any foreign military base on its territory, but welcomed any country to conduct joint land or sea military drills with Cambodia»​ ឬ​ប្រែ​ជា​ភាសាខ្មែរ​មាន​ន័យ​ថា​ «លោក​នាយករដ្ឋមន្រ្តី​ ហ៊ុន សែន​ បាន​មាន​ប្រសាសន៍​ថា​ រដ្ឋាភិបាល​នឹង​មិន​អនុញ្ញាត​ឱ្យ​មាន​មូលដ្ឋាន​យោធា​បរទេស​ណា​មួយ​ មាន​នៅ​លើ​ទឹក​ដី​របស់​ខ្លួន​នោះ​ទេ​ ប៉ុន្តែ​ស្វាគមន៍​ប្រទេស​ណា​មួយ ​ដើម្បី​ធ្វើ​សម​យុទ្ធ​យោធា​រួមគ្នា​តាម​សមុទ្រ​ជាមួយ​នឹង​កម្ពុជា​​»។​

New Straits Times Report | Archived Link 

ដោយ​ឡែក​ថ្មីៗ​នេះ​ លោក​ ទៀ​ បាញ់​ រដ្ឋ​មន្ត្រី​ក្រសួង​ការពារ​ជាតិ​ ក៏​បាន​លើក​ឡើង​ផង​ដែរ​ទាក់​ទង​ទៅ​នឹង​ រឿង​ចោទ​ប្រកាន់​មាន​មូល​ដ្ឋានកង​​ទ័ព​ចិន​នៅ​ដែន​សមុទ្រ​រាម​ ខេត្ត​ព្រះ​សីហនុ ដែលបាន​ចុះ​ផ្សព្វ​ផ្សាយ​ដោយ​ទំព័រ​ហ្វេសប៊ុក​សារ​ព័ត៌មាន​ Fresh News កាល​ពីថ្ងៃ​ទី​០៩​ ខែ​មិថុនា​ឆ្នាំ​២០២១​​​​។​ ការ​លើក​ឡើង​នេះ​ ត្រូវ​បាន​ធ្វើ​ឡើង​នៅ​ក្នុង​ពិធី​យក​ដំណក់​ប្រេង​ទៅ​តម្កល់​នៅ​វិមាន​ឈ្នះ​-ឈ្នះ​។​ លោក​បាន​និយាយ​​យ៉ាង​ដូច្នេះ​ថា ​«ការ​ចោទ​មូល​ដ្ឋាន​ទ័ព​ចិន​នៅ​រាម​ ទោះ​បំភ្លឺ​ប៉ុន្មាន​ក៏​នៅ​តែ​ដដែល​ ព្រោះ​មិន​បាន​តាម​បំណង​អាមេរិក​»។​ លោក​ក៏​បាន​បញ្ជាក់​ផង​ដែរ​ថា​ ការ​ចុះ​ទស្សន​កិច្ច​របស់​មន្ត្រី​អនុ​ព័ន្ធ​យោធា​អាមេរិក​ទៅ​កាន់​សមុទ្រ​រាម​នោះ ​ក៏​មិន​អាច​បិទ​បញ្ចប់​ការ​ចោទ​ប្រកាន់​របស់​អាមេរិក​មក​លើ​កម្ពុជា​បាន​នោះ​ឡើយ​។

រូប​ភាព​ផ្ដាម​ចេញ​ពី​ទំព័រសារព័ត៌មាន​ Fresh News ដែល​បាន​សរសេរ​រៀប​រាប់​​​​ចំណង​ជើង​ជា​ភាសា​​ខ្មែរ​ថា​ «​សម្តេច​ ទៀ​ បាញ់​៖ ការ​ចោទ​មូល​ដ្ឋាន​ទ័ព​ចិន​នៅ​រាម​ ទោះ​បំភ្លឺ​ប៉ុន្មាន​ក៏​នៅ​តែ​ដដែល​ ព្រោះ​មិន​បាន​តាម​បំណង​អាមេរិក​»​។

Facebook Link | Archived Link

សន្និដ្ឋាន (Conclusion)

Fact Crescendo Cambodia បាន​​រក​​ឃើញ​​ថា ការ​អះ​អាង​ដូច​បានរៀបរាប់ខាងលេីនេះ គឺ​មិន​ត្រឹម​ត្រូវ​នោះ​ឡេីយ​។ រូប​ថត​ទាំង​ពីរ​​​សន្លឹក​​នេះ​ មិន​​មែនជា​ទិដ្ឋភាព​​​មូល​ដ្ឋាន​ទ័ព​ចិន​នៅ​ក្នុង​ប្រទេស​កម្ពុជា​នោះ​ទេ​​។ ការ​​ពិត​​រូប​ថត​​ពីរ​​​សន្លឹក​​នេះ​​ គឺ​​ត្រូវ​បាន​គេ​រក​ឃើញ​នៅ​ក្នុង​លំហាត់​សម​យុទ្ឋ​នាគ​មាស​លើក​ទី​៤​ ដែល​ធ្វើ​ឡើង​នៅ​ក្នុង​ខេត្ត​កំពត​ តាំង​ពី​ឆ្នាំ​២០២០​​មក​ម្ល៉េះ​​។​

Avatar

Title:តើ​រូប​ថត​នេះ​​ជា​ទិដ្ឋ​ភាព​មូលដ្ឋាន​កង​ទ័ព​ចិន​នៅ​កម្ពុជា​មែន​ឬ​​?

Fact Check By: Kakada Sim 

Result: False

Leave a Reply

Your email address will not be published.