ខណៈដែលប្រជាជនកម្ពុជាប្រារព្ធពិធីបុណ្យកាន់បិណ្ឌរយៈពេល ១៥ថ្ងៃនោះ រូបថតមួយសន្លឹកដែលបង្ហាញតារាចម្រៀងកូរ៉េម្នាក់ កាន់ចានស្រាក់ក្នុងឈុតសម្លៀកបំពាក់ប្រពៃណីខ្មែរ ដោយមានប្រឡាក់ភក់ផងនោះ ត្រូវបានបង្ហោះនៅលើបណ្ដាញសង្គម។ រូបថតនេះ ត្រូវបានចែកចាយ និងប្រតិកម្មចម្រុះពីសំណាក់អ្នកប្រើប្រាស់បណ្ដាញសង្គមហ្វេសប៊ុកយ៉ាងផុសផុល។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia រកឃើញថា រូបថតខាងលើ គឺត្រូវបានកាត់ត។
ការអះអាងលើបណ្តាញសង្គម
កាលពីថ្ងៃទី១៣ ខែកញ្ញា ឆ្នាំ២០២២កន្លងទៅនេះ អ្នកប្រើប្រាស់ហ្វេសប៊ុកម្នាក់ បានបង្ហោះរូបមួយសន្លឹក ចូលទៅក្នុងក្រុមហ្វេសប៊ុកឈ្មោះថា «Hang Meas HD TV»។ រូបថតនេះ បានបង្ហាញតារាចម្រៀងស្រីកូរ៉េ ដែលត្រូវបានគេស្គាល់ថា ជាសមាជិកមួយរូបរបស់ក្រុម Black Pink គឺកញ្ញា Jennie ក្នុងឈុតសម្លៀកបំពាក់ប្រពៃណីខ្មែរ។
រូបថតបង្ហោះខាងលើនេះ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។
ខាងក្រោមនេះ គឺជារូបភាពផ្ដាមចេញពីប៉ុស្ដិ៍អ្នកប្រើប្រាស់ហ្វេសប៊ុកខាងលើ ដែលបានសរសេរថា «ប្រញាប់ចង្ហាន់ព្រឹក»។
ការត្រួតពិនិត្យការពិត
Fact Crescendo Cambodia ចាប់ផ្ដើមត្រួតពិនិត្យទៅលើរូបថតខាងលើនេះ តាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតដែលមានទម្រង់ និងសណ្ឋានដូចគ្នានេះ ត្រូវបានរកឃើញនៅលើទំព័រហ្វេសប៊ុក «Chacha-ឆាឆា» ដែលបានបង្ហោះកាលពីថ្ងៃទី២២ ខែកញ្ញា ឆ្នាំ២០២១កន្លងទៅនេះ។ រូបថតមួយសន្លឹកនេះ ត្រូវបានបង្ហោះនៅក្នុងបណ្ដាញសង្គមហ្វេសប៊ុក អំឡុងពេលប្រជាជនកម្ពុជាប្រារព្ធពិធីបុណ្យភ្ជុំបិណ្ឌកាលពីឆ្នាំ២០២១កន្លងទៅ ដែលនេះ គ្រាន់តែជាផ្នែកនៃការថតសម្ដែងរបស់លោក «Chacha-ឆាឆា» តែប៉ុណ្ណោះ។
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកខាងលើ ពុំបានបង្ហាញទិដ្ឋភាពតារាចម្រៀងស្រីកូរ៉េ Jennie នៅក្នុងឈុតសម្លៀកបំពាក់ប្រពៃណីខ្មែរនោះឡើយ។
ខាងក្រោមនេះ គឺជាការប្រៀបធៀបគ្នារវាងរូបថតដែលត្រូវបានកាត់ត និងរូបថតច្បាប់ដើមដែលត្រូវបានរកឃើញផ្សព្វផ្សាយនៅលើបណ្តាញសង្គម។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia រកឃើញថា រូបថតដូចដែលរៀបរាប់ខាងលើត្រូវបានកាត់ត មុននឹងបង្ហោះនៅលើបណ្ដាញសង្គម។ ការពិតច្បាប់ដើមនៃរូបថតនេះ ពុំបានបង្ហាញតារាចម្រៀងកូរ៉េ Jennie ក្នុងឈុតសម្លៀកបំពាក់ប្រពៃណីខ្មែរនោះឡើយ។ រូបថតនេះ គឺជាទិដ្ឋភាពនៃការថតសម្ដែងរបស់លោក «Chacha-ឆាឆា» កាលពីពិធីបុណ្យភ្ជុំបិណ្ឌឆ្នាំមុនតែប៉ុណ្ណោះ។
Title:តារាចម្រៀងកូរ៉េម្នាក់ត្រូវបានកាត់តដោយស្លៀកពាក់ឈុតប្រពៃណីខ្មែរ
Fact Check By: Kakada SimResult: Altered
