បន្ទាប់ពីរដ្ឋប្រហារយោធាភូមាដែលបានទម្លាក់មេដឹកនាំរដ្ឋាភិបាលជាប់ឆ្នោតរបស់អ្នកស្រី អ៊ុងសាន ស៊ូជី កាលពីដើមខែកុម្ភៈកន្លងមក អ្នកប្រើបណ្ដាញសង្គមកម្ពុជា បានចែករំលែកនូវព័ត៌មានជាច្រើនអំពីវិបត្តិនយោបាយ និងអំពើហិង្សាដ៏បង្ហូរឈាមនៅក្នុងប្រទេសមួយនេះ។
ក្នុងចំណោមនោះ រូបថតមួយសន្លឹក ត្រូវបានបង្ហោះក្នុងបណ្ដាញសង្គមរួមជាមួយការចោទសួរថា តើមេដឹកនាំយោធាភូមា លោក មិន អ៊ុងលាំង ត្រូវបានចាប់ខ្លួនដោយកម្លាំងសន្តិសុខមែន ឬយ៉ាងណា។ រូបថតមួយសន្លឹកនេះ ត្រូវបានចែករំលែកតៗគ្នានៅលើបណ្ដាញសង្គមផ្សេងទៀតផងដែរ។
ទោះជាយ៉ាងណា ការត្រួតពិនិត្យរបស់ Fact Crescendo Cambodia បានរកឃើញថា រូបថតរួមជាមួយការអះអាងបែបនោះ មិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីថ្ងៃទី១៨ ខែមីនា ឆ្នាំ២០២០កន្លងមក ទំព័រហ្វេសប៊ុកមួយបានបង្ហោះរូបថតមួយសន្លឹក ដែលបង្ហាញរូបមេដឹកនាំយោធាភូមា លោក មិន អ៊ុងលាំង ត្រូវបានចាប់ខ្លួនដោយកងកម្លាំងប្រដាប់អាវុធ។ ទំព័រហ្វេសប៊ុកមួយនេះ បានចោទសួរថា តើមេដឹកនាំរបបសឹកភូមារូបនេះ ពិតជាត្រូវបានគេចាប់ខ្លួនមែន ឬក៏យ៉ាងណា។
រូបភាពផ្ដាមចេញពីប៉ុស្តិ៍នៃទំព័រហ្វេសប៊ុកនោះ រៀបរាប់ថា «តើជាការពិតដែរឬទេ គឺជាស្ថានភាពនៃមេដឹកនាំផ្ដាច់ការភូមានៅពេលនេះ? បើពិតមែននោះ សូមចូលរួមអបអរសាទររីករាយជាមួយប្រជាជនភូមា…ពីចម្ងាយផង»។
ការពិនិត្យការពិត
Fact Crescendo Cambodia បានចាប់ផ្ដើមផ្ទៀងផ្ទាត់ទៅលើរូបថតនេះតាមរយៈការដំណើរការកម្មវិធីស្វែងរករូបថតរបស់ Google Reverse Image ដែលនាំឱ្យយើងឈានទៅប្រទះឃើញរូបថតដើម និងព័ត៌មានលម្អិតនៃរូបថតនេះទាំងស្រុង។
រូបថតដើម ត្រូវបានរកឃើញនៅក្នុងអត្ថបទព័ត៌មានរបស់សារព័ត៌មាន New York Times ចុះផ្សាយកាលពីថ្ងៃទី១២ ខែកុម្ភៈ ឆ្នាំ២០១៩ ពោលគឺជាង ២ឆ្នាំមុនរដ្ឋប្រហារយោធាកើតឡើងនៅក្នុងប្រទេសភូមា។
រូបថតមួយសន្លឹកនេះ បង្ហាញបុរសម្នាក់ត្រូវបានកងកម្លាំងសន្តិសុខក្រៀកជាប់ ដើម្បីឡើងសវនការដ៏ធំមួយ ក្រោមការចោទប្រកាន់ថា បានពាក់ព័ន្ធនឹងការប៉ុនប៉ងធ្វើរដ្ឋប្រហារកាលពីឆ្នាំ២០១៦។
ខ្លឹមសាររូបថតមួយសន្លឹកនេះ សរសេរជាភាសាអង់គ្លេសថា «Turkish soldiers accused of involvement in an attempted coup in 2016 arriving at court inside the Sincan Prison in Ankara in 2017» ឬអាចប្រែមស្រួលជាភាសាខ្មែរថា «ក្រុមទាហានតួកគីដែលត្រូវបានចោទប្រកាន់ពីបទជាប់ពាក់ព័ន្ធនឹងការប៉ុនប៉ង់ធ្វើរដ្ឋប្រហារនៅឆ្នាំ២០១៦កន្លងមក បានធ្វើដំណើរទៅដល់បរិវេណខាងក្នុងរបស់តុលាការ»
New York Times | Archived Link
ក្នុងអត្ថបទមួយរបស់ខ្លួន សារព័ត៌មាន New Light of Myanmar បានចុះផ្សាយជាមួយផងដែរនូវរូបថតមេដឹកនាំយោធាភូមា លោក មិន អ៊ុងលាំង ដែលបានថតរូបជាមួយក្រុមមន្ត្រីប្រេសិតពិសេសរបស់អាស៊ាននៅក្នុងជំនួបកាលពីថ្ងៃទី០៤ ខែមិថុនាកន្លងមកថ្មីៗនេះ។
New Light of Myanmar | Archived Link
សន្និដ្ឋាន
Fact Crescendo Cambodia រកឃើញថា រូបថតដូចបានរៀបរាប់ខាងលើនេះ មិនត្រឹមត្រូវនោះឡើយ។ មេដឹកនាំយោធាភូមា លោក មិន អ៊ុងលាំង មិនត្រូវបានកងកម្លាំងសន្តិសុខចាប់ខ្លួនដូចរូបថតនោះឡើយ។ រូបថតដើម បង្ហាញមន្ត្រីយោធាតួកគី ដែលត្រូវបានចោទពីបទជាប់ពាក់ព័ន្ធនឹងការប៉ុនប៉ងធ្វើរដ្ឋប្រហារកាលពីឆ្នាំ២០១៦ ត្រូវបាននាំឡើងតុលាការនៅក្នុងបរិវេណពន្ធនាគារ Sincan ស្ថិតនៅទីក្រុងអង់ការ៉ា កាលពីឆ្នាំ២០១៧។
Title:គ្មានការចាប់ខ្លួនមេដឹកនាំយោធាភូមា មិន អ៊ុងលាំង ដូចនឹងរូបថតនោះឡើយ
Fact Check By: Jay UdomResult: Altered
