- >>
- Political
មេសហជីព និងសកម្មជនច្រានចោលការអះអាងថា ពួកគេទទួលបានលុយជាថ្នូរនឹងកូដកម្ម
អ្នកប្រើប្រាស់បណ្ដាញសង្គមមួយ បានអះអាងថា អតីតបុគ្គលិកក្រុមហ៊ុនកាស៊ីណូណាហ្គា ទទួលបានលុយចំនួន ២០ដុល្លារសម្រាប់ការដេកធ្វើកូដកម្មប្រឆាំងនឹងក្រុមហ៊ុនមួយនេះ ហើយថា ក្រុមសកម្មជនទទួលបានថវិកាចំនួន ៥០ដុល្លារក្នុងមួយថ្ងៃសម្រាប់កូដកម្មបង្អត់អាហារខ្លួនឯង។
ការអះអាងមួយនេះ ត្រូវបានចែករំលែកទៅកាន់ក្រុមបណ្ដាញសង្គមហ្វេសប៊ុក ដែលនាំឱ្យមានការបញ្ចេញមតិផ្សេងៗ និងទទួលបានប្រតិកម្មចម្រុះបែបផងដែរ។
ការអះអាងនៅលើបណ្ដាញសង្គមបែបនេះ ត្រូវបានធ្វើឡើង បន្ទាប់ពីក្រុមយុវជនខ្មែរថាវរៈ បានធ្វើកូដកម្មបង្អត់អាហារខ្លួនឯង ដើម្បីទាមទារឱ្យដោះលែងសកម្មជនសិទ្ធិមនុស្ស អ្នកនាង សេង ធារី ដែលត្រូវបានដាក់ឱ្យស្ថិតក្រោមការឃុំខ្លួននៅឯពន្ធនាគារខេត្តព្រះវិហារ។
ការអះអាងដដែលនេះ ក៏ត្រូវបានធ្វើឡើងចំពេលក្រុមបុគ្គលិកក្រុមហ៊ុនកាស៊ីណូណាហ្គាវើលដ៍បន្តធ្វើកូដកម្មប្រឆាំងនឹងក្រុមហ៊ុនមួយនេះផងដែរជុំវិញវិវាទការងាររបស់ពួកគេ។
ខាងក្រោមនេះ គឺជារូបភាពផ្ដាមពីការអះអាងលើបណ្ដាញសង្គមកាលពីថ្ងៃទី១០ ខែវិច្ឆិកា ឆ្នាំ២០២២ ដែលមានសំណេរលើរូបថតថា «ដេកបាតុកម្មនៅ Naga 1ថ្ងៃ/20$» និងសំណេរលើរូបថតមួយសន្លឹកទៀតថា «សម្ដែងធ្វើជាអត់ស៊ីបាយ 1ថ្ងៃ/50$»។
ថ្មីៗនេះ Fact Crescendo Cambodia បានសម្ភាសជាមួយតំណាងអតីតបុគ្គលិកក្រុមហ៊ុនកាស៊ីណូណាហ្គា និងតំណាងក្រុមយុវជនខ្មែរថាវរៈ ដើម្បីបកស្រាយតបនឹងការអះអាងនេះ។
កញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ បានច្រានចោលការអះអាងនេះ ដោយនិយាយថា ក្រុមកូដករទាំងនោះពុំទទួលបានលុយកាក់ពីខាងណានោះឡើយ។
មេដឹកនាំសហជីពរូបនេះ បានបញ្ជាក់បែបនេះមកកាន់ Fact Crescendo Cambodia តាមរយៈសារបណ្ដាញសង្គមកាលថ្ងៃព្រហស្បតិ៍កន្លងមកនេះ។
នៅពេលត្រូវបានសាកសួរថា តើពួកគាត់ទ្រទ្រង់ជីវភាពរស់នៅប្រចាំថ្ងៃដោយរបៀបណា បន្ទាប់ពីគ្មានការងារធ្វើជាច្រើនខែមកហើយនោះ កញ្ញា ឈឹម ស៊ីថរ បញ្ជាក់បន្ថែមថា ក្រុមកូដករទាំងនោះពឹងផ្អែកទៅលើសមាជិកក្រុមគ្រួសារ និងសាច់ញាតិរបស់ពួកគេសម្រាប់គាំទ្រដល់ជីវភាពរស់នៅប្រចាំថ្ងៃ។
រីឯកញ្ញា ឈឿន ដារ៉ាវី ដែលជាសមាជិកម្នាក់នៃក្រុមយុវជនខ្មែរថាវរៈ ក៏បានច្រានចោលការអះអាងនេះផងដែរ ហើយបញ្ជាក់ថា ក្រុមរបស់នាងបានពឹងផ្អែកលើការលក់ដូរអង្ករត្រីសាច់ និងផលិតផលមួយចំនួនទៀត ដើម្បីទ្រទ្រង់ដល់ជីវភាពរស់នៅរបស់ពួកគេ។
សកម្មជនសង្គមរូបនេះ បានបញ្ជាក់បែបនេះមកកាន់ Fact Crescendo Cambodia តាមរយៈសារបណ្ដាញសង្គមកាលពីថ្ងៃម្សិលមិញនេះ។
សូមបញ្ជាក់ថា ក្រៅពីរងការចោទថាទទួលបានលុយសម្រាប់ការធ្វើកូដកម្មបង្អត់អាហារខ្លួនឯងហើយនោះ សមាជិក ២នាក់ទៀតនៃក្រុមយុវជនខ្មែរថាវរៈ មានលោក ហ៊ុន វណ្ណៈ និងលោក ស្វាយ សំណាង រងការចោទពីអាជ្ញាធរថា មានជាប់ពាក់ព័ន្ធនឹងបទល្មើសរំលោភ ប៉ុន្តែ ពួកគេបានច្រានចោលការចោទប្រកាន់បែបនេះ និងចាត់ទុកជាការប្រឌិតទម្លាក់កំហុសទៅលើពួកគេ។
សម្រាប់ព័ត៌មានលម្អិត សូមអានសេចក្ដីរាយការណ៍របស់វិទ្យុអាស៊ីសេរីចុះផ្សាយកាលពីថ្ងៃអាទិត្យកន្លងមកនេះតាមរយៈតំណភ្ជាប់នៅទីនេះ។ក្រុមយុវជនខ្មែរថាវរៈ បានធ្វើកូដកម្មបង្អត់អាហារខ្លួនឯងរយៈពេល ១សប្ដាហ៍ ចាប់ពីថ្ងៃទី០៧ ដល់ថ្ងៃទី១៣ ខែវិច្ឆិកា ដើម្បីទាមទារឱ្យអាជ្ញាធរដោះលែងសកម្មជនសិទ្ធិមនុស្ស អ្នកនាង សេង ធារី ដែលត្រូវបានតុលាការកម្ពុជាកាត់ទោសឱ្យជាប់ពន្ធនាគារក្រោមការចោទប្រកាន់ពីបទ«រួមគំនិតក្បត់ជាតិ»ជាមួយលោក សម រង្ស៊ី។
Title:មេសហជីព និងសកម្មជនច្រានចោលការអះអាងថា ពួកគេទទួលបានលុយជាថ្នូរនឹងកូដកម្ម
By: Jay UdomResult: Explainer
