កម្ពុជា និងប្រទេសដទៃទៀតនៅលើពិភពលោក នៅតែបន្តប្រយុទ្ធនឹងការឆ្លងរីករាលដាលនៃមេរោគកូវីដ-១៩ ដោយបានដាក់ចេញជាវិធានការផ្សេងៗ ដូចជា ការហាមឃាត់ប្រជាជនចេញពីផ្ទះសម្បែង ការបិទខ្ទប់ទីក្រុង ការហាមឃាត់ការធ្វើដំណើរ ការបិទផ្អាកដំណើរការអាជីវកម្ម និងដំណើរការនៃស្ថាប័នសាធារណៈនានា។ ទន្ទឹមគ្នានេះ ការអះអាងមួយនៅលើបណ្ដាញសង្គម បាននិយាយថា មេដឹកនាំរុស្ស៊ីបានប្រើសត្វតោ និងសត្វខ្លារាប់រយក្បាល ដើម្បីរារាំងប្រជាជនរុស្ស៊ីកុំឱ្យចាកចេញពីផ្ទះសម្បែងរបស់ពួកគេ។ ទោះជាយ៉ាងណា ការផ្ទៀងផ្ទាត់ការពិត រកឃើញថា ការអះអាងលើបណ្ដាញសង្គមនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីខែមីនា ឆ្នាំ២០២០កន្លងមក ទំព័រហ្វេសប៊ុកមួយបានអះអាងថា ប្រធានាធិបតីរុស្ស៊ី លោក វ៉្លាឌីមៀរ ពូទីន (Vladimir Putin) បានព្រលែងសត្វតោ និងខ្លាចំនួន ៥០០ក្បាលនៅក្នុងទីក្រុងមួយ ដើម្បីរារាំងប្រជាជនកុំឱ្យចាកចេញពីផ្ទះក្នុងបំណងទប់ស្កាត់ការឆ្លងរីករាលដាលនៃមេរោគកូរ៉ូណា ឬកូវីដ-១៩។
ការអះអាងមួយនេះ ត្រូវបានចែករំលែកតៗគ្នារហូតដល់ទៅរាប់ម៉ឺនដងកាលពីឆ្នាំមុនជាមួយការបញ្ចេញមតិ និងប្រតិកម្មចម្រុះបែប ហើយថ្មីៗនេះ វាបានលេចឡើងវិញនៅលើបណ្ដាញសង្គមមួយនេះ។
រូបភាពផ្ដាមចេញពីការអះអាងដោយទំព័រហ្វេសប៊ុកមួយកាលពីឆ្នាំមុន រៀបរាប់ថា «ដើម្បីទប់ស្កាត់ការរីករាលដាលជំងឺខូវិដ១៩ ពូទីន បានព្រលែងសត្វខ្លា និងតោចំនួន៨០០ក្បាលទូទាំងប្រទេស ដើម្បីជំរុញឱ្យប្រជាពលរដ្ឋស្នាក់នៅក្នុងផ្ទះ
ការត្រួតពិនិត្យការពិត
Fact Crescendo Cambodia ចាប់ផ្ដើមផ្ទៀងផ្ទាត់ការពិតទៅលើការអះអាងនេះតាមរយៈការពិនិត្យមើលរូបថតនៅក្នុងកម្មវិធីស្វែងរករូបថតរបស់ Google និងព័ត៌មានចេញផ្សាយដោយសារព័ត៌មានអន្តរជាតិនានា ដែលនាំឱ្យរកឃើញការពិតជុំវិញការអះអាងនេះ។
សារព័ត៌មានអន្តរជាតិនានា សុទ្ធតែបានចុះផ្សាយថា ប្រធានាធិបតីរុស្ស៊ី លោក វ៉្លាឌីមៀ ពូទីន មិនបានបញ្ជា ឬចេញសម្រេចឱ្យព្រលែងសត្វតោ និងខ្លានៅក្នុងទីក្រុងនានា ដើម្បីទប់ស្កាត់កុំឱ្យប្រជាជនចាកចេញពីផ្ទះសម្បែងរបស់ពួកគេនោះឡើយ។
គេហទំព័រទូរទស្សន៍ Global News របស់ប្រទេសកាណាដា បានចុះផ្សាយកាលពីខែមីនាឆ្នាំមុនថា លោក ពូទីន មិនបានធ្វើអ្វីដូចដែលគេបានអះអាងនៅលើបណ្ដាញសង្គមនោះឡើយ។
បើលោក ពូទីន មិនបានចេញបញ្ជា ឬចេញសម្រេចបែបនេះ សំណួរចោទសួរថា តើរូបថតសត្វតោមួយក្បាលដើរតាមផ្លូវនៅទីក្រុង មានប្រភពកើតឡើងនៅទីណា និងនៅពេលណា?
ក្រុមការងារផ្ទៀងផ្ទាត់ព័ត៌មានពិត Fact Crescendo នៅក្នុងប្រទេសឥណ្ឌា បានរកឃើញថា រូបថតសត្វតោដើរនៅកណ្ដាលទីក្រុងនេះ ត្រូវបានចុះផ្សាយដោយសារព័ត៌មានអង់គ្លេស The Sun របស់ប្រទេសអង់គ្លេសកាលពីថ្ងៃទី១៩ ខែឧសភា ឆ្នាំ២០១៦កន្លងមក។
បើតាមអត្ថបទរបស់សារព័ត៌មានអង់គ្លេស រូបថតមួយសន្លឹកនេះ បង្ហាញសត្វតោមួយក្បាលនៅទីក្រុងចូហ៊ែនណេស្បឺក ប្រទេសអាហ្វ្រិកខាងត្បូង។ រូបថតមួយសន្លឹកនេះ បានមកពីការថតភាពយន្ត។
តោមួយក្បាលនេះ មានឈ្មោះថាកូឡុំប៊ឺស (Columbus) ហើយបានបង្ហាញខ្លួននៅក្នុងភាពយន្ត និងវីដេអូផ្សាយពាណិជ្ជកម្មជាច្រើន។ ក្រុមការងារផលិតភាពយន្ត បានសម្រេចព្រលែងតោមួយក្បាលនេះនៅក្នុងតំបន់ និងតាមផ្លូវដែលត្រូវបានបិទជិត ដើម្បីឱ្យពួកគេអាចថតសកម្មភាពសត្វតោស្រែកគ្រហឹមពេញទីក្រុង។
សន្និដ្ឋាន
Fact Crescendo Cambodia រកឃើញថា ការអះអាងដូចបានរៀបរាប់ខាងលើនេះ មិនមែនជាការពិតនោះឡើយ។ ប្រធានាធិបតីរុស្ស៊ី លោក វ៉្លាឌីមៀ ពូទីន មិនបានចេញបញ្ជា ឬសេចក្ដីសម្រេចព្រលែងសត្វតោ ឬសត្វខ្លា ដើម្បីទប់ស្កាត់កុំឱ្យប្រជាជនរុស្ស៊ីចាកចេញពីផ្ទះសម្បែងពួកគេនោះឡើយ។ រូបថតសត្វតោដើរក្បាលទីក្រុងនេះ គឺជាសត្វតោឈ្មោះកូឡុំប៊ឺស ដែលត្រូវបានព្រលែងនៅទីក្រុងដើម្បីឱ្យវាគ្រហឹមពេញទីក្រុងសម្រាប់ការថតភាពយន្ត និងវីដេអូពាណិជ្ជកម្ម។
Title:លោក ពូទីន មិនបានព្រលែងតោបំភ័យប្រជាជនឱ្យនៅក្នុងផ្ទះដើម្បីការពារការឆ្លងកូវីដ-១៩នោះឡើយ
Fact Check By: Jay UdomResult: False
