ខណៈដែលមេរោគកូវីដ-១៩កំពុងបន្តឆ្លងរាលដាលនៅកម្ពុជានោះ រដ្ឋាភិបាលបានជំរុញឱ្យពាក់ម៉ាស់ រក្សាគម្លាតសុវត្ថិភាព លាងដៃជាមួយទឹកអនាម័យជាប្រចាំ និងចាក់វ៉ាក់សាំងបង្ការជំងឺមួយនេះ។ ទន្ទឹមគ្នានេះ វីដេអូមួយ ត្រូវបានបង្ហោះលើបណ្ដាញសង្គមហ្វេសប៊ុក ដោយបង្ហាញលោកនាយករដ្ឋមន្ត្រី ហ៊ុន សែន ទទួលការចាក់វ៉ាក់សាំង ហើយថ្លែងថា លោកនឹងបណ្ដេញបុគ្គលដែលពាក់ម៉ាស់ចេញពីកម្មវិធីរបស់លោក។ ទោះយ៉ាងណា ការផ្ទៀងផ្ទាត់ការពិត បង្ហាញថា រូបភាពនៃវីដេអូ និងសំឡេង មិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី០៦ ខែឧសភា ឆ្នាំ២០២១កន្លងទៅនេះ មានអ្នកប្រើបណ្តាញសង្គមហ្វេសប៊ុកមួយ បានបង្ហោះវីដេអូមួយ ដែលបង្ហាញលោកនាយករដ្ឋមន្ត្រី ហ៊ុន សែន ការចាក់វ៉ាក់សាំង។ វីដេអូនេះ ក៏បង្ហាញការថ្លែងរបស់លោក ហ៊ុន សែន ដែលបានថ្លែងបណ្ដេញបុគ្គលពាក់ម៉ាស់ចេញពីកម្មវិធីរបស់លោកផងដេរ។ វីដេអូរយៈពេល ៦នាទីមួយនេះ មានអ្នកចូលទស្សនារហូតដល់ទៅរាប់ពាន់ដង។
សំឡេងលោក ហ៊ុន សែន នៅក្នុងវីដេអូ «នែ៎! នៅក្នុងហ្នឹង បើសិនមាននរណាមួយពាក់ម៉ាស់ ខ្ញុំដេញចេញ! មកពាក់ម៉ាស់ស្អី នៅក្នុងកន្លែងនេះ? នេះអត់មានអ្នកណាពាក់ម៉ាស់ទេ បើសិនជាពាក់ម៉ាស់ខ្ញុំដេញចេញ។ អត់ឲ្យនៅហ្នឹងទេ! អ្ហែងទៅស៊ីជាមួយម៉ាស់ ទៅនៅជាមួយម៉ាស់ទៅ! ខ្លាមិនខ្លាចទៅខ្លាចអាចម៍ខ្លា! វាឆ្ងល់រឿងកន្លែងហ្នឹង! អត់ទាន់ងាប់ម្នាក់ផង»។ ការបង្ហោះនូវវីដេអូមួយនេះ ត្រូវបានចែករំលែកតៗគ្នាជាច្រើននាប៉ុន្មានថ្ងៃចុងក្រោយនេះពី សំណាក់អ្នកប្រើហ្វេសប៊ុកនិយាយភាសាខ្មែរ។
រូបភាពផ្ដាមចេញពីប៉ុស្តិ៍របស់អ្នកប្រើប្រាស់ហ្វេសប៊ុកដែលបានរៀបរាប់ថា «Style! អាណាពាក់ម៉ាស់! ដេញចេញ!»។
ការត្រួតពិនិត្យការពិត
Fact Crescendo Cambodia បានចាប់ផ្តើមផ្ទៀងផ្ទាត់វីដេអូ និងសំឡេងតាមរយៈការត្រួតពិនិត្យនូវឯកសារវីដេអូបង្ហោះរបស់ទំព័រហ្វេសប៊ុកលោកនាយករដ្ឋមន្ត្រី ហ៊ុន សែន ដែលនាំឲ្យទៅរកឃើញការពិតប្រភពដើមនៃវីដេអូ និងការថ្លែងរបស់លោក ហ៊ុន សែន ដែលមានទម្រង់ដូចគ្នាទាំងស្រុង។
វីដេអូមួយនេះ ត្រូវបានរកឃើញនៅលើទំព័រហ្វេសប៊ុកផ្លូវការរបស់លោកនាយករដ្ឋមន្ត្រី ហ៊ុន សែន ដែលបានផ្សាយកាលពីថ្ងៃទី២០ ខែមេសា ឆ្នាំ២០២១កន្លងមកនេះ អំពីការចាក់វ៉ាក់សាំងដូសទី២របស់លោក និងក្រុមគ្រួសាររបស់លោក ដែលធ្វើឡើងនៅគេហដ្ឋានរបស់លោកស្ថិតនៅឯក្រុងតាខ្មៅ។ ក្នុងវីដេអូដែលមានរយៈពេលប្រមាណជា ៣នាទីនោះ លោកពុំបានថ្លែងអំពីការបណ្តេញចេញអ្នកដែលពាក់ម៉ាស់នោះឡើយ។
រូបភាពផ្ដាមចេញពីទំព័រហ្វេសបុ៊ុករបស់លោកនាយករដ្ឋមន្ត្រី ហ៊ុន សែន ដែលបានសរសេររៀបរាប់ជាភាសាខ្មែរថា «សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ព្រមទាំងបុត្រីពៅ អញ្ជើញចាក់វ៉ាក់សាំងកូវីដ-១៩ ដូសទី២»។
សំឡេងនៅក្នុងវីដេអូនេះ ត្រូវបានរកឃើញនៅក្នុងការផ្សាយផ្ទាល់លើទំព័រហ្វេសប៊ុកផ្លូវការរបស់គាត់កាលពីថ្ងៃទី៣០ ខែមករា ឆ្នាំ២០២០កន្លងមក ដែលលោកបានថ្លែងអំពីមេរោគកូវីដ-១៩។ មេដឹកនាំកម្ពុជារូបនេះ បានបញ្ចេញនូវការយល់ឃើញរបស់លោកមិនយល់ស្របទៅនឹងការឆ្លងរីករាលដាលនៃមេរោគកូរ៉ូណា និងហានិភ័យនៃមេរោគមួយនេះ ដែលការឆ្លងលើកដំបូងត្រូវបានរកឃើញនៅទីក្រុងអ៊ូហាន ប្រទេសចិន នោះឡើយ។
ក្នុងវីដេអូនៅត្រង់នាទី៥០ដល់នាទី៥១ លោក ហ៊ុន សែន ថ្លែងថា «នែ៎! នៅក្នុងហ្នឹង បើសិនមាននរណាមួយពាក់ម៉ាស់ ខ្ញុំដេញចេញ! មកពាក់ម៉ាស់ស្អី នៅក្នុងកន្លែងនេះ? នេះអត់មានអ្នកណាពាក់ម៉ាស់ទេ បើសិនជាពាក់ម៉ាស់ខ្ញុំដេញចេញ។ អត់ឲ្យនៅហ្នឹងទេ! អ្ហែងទៅស៊ីជាមួយម៉ាស់ ទៅនៅជាមួយម៉ាស់ទៅ! ខ្លាមិនខ្លាចទៅខ្លាចអាចម៍ខ្លា! វាឆ្ងល់រឿងកន្លែងហ្នឹង! អត់ទាន់ងាប់ម្នាក់ផង»។
រូបភាពផ្ដាមចេញពីទំព័រហ្វេសប៊ុករបស់លោកនាយករដ្ឋមន្រ្តី ដែលបានសរសេររៀបរាប់ថា «ការថ្លែងសាររបស់លោក នាយករដ្ឋមន្ត្រី អំពីជំងឺរលាកផ្លូវដង្ហើមកូរ៉ូណា»។
សន្និដ្ឋាន (Conclusion)
Fact Crescendo Cambodia បានរកឃើញថា វីដេអូមួយដែលមានសំឡេងលោកនាយករដ្ឋមន្ត្រី ហ៊ុន សែន ដែលបានថ្លែងដេញ អ្នកដែលពាក់ម៉ាស់នោះ គឺជាការធ្វើឲ្យមានការយល់ច្រឡំ។ វីដេអូមួយនេះ បង្ហាញលោក ហ៊ុន សែន ទទួលការចាក់វ៉ាក់សាំងដូសទី២កាលពីខែមេសា ឆ្នាំ២០២១។ សំឡេងនៅក្នុងវីដេអូនេះ គឺជាសំឡេងដើមរបស់លោក ហ៊ុន សែន ដែលបានថ្លែងកាលពីចុងខែមករា ឆ្នាំ២០២០កន្លងមក។
Title:តើលោក ហ៊ុន សែន បានថ្លែងបណ្ដេញអ្នកពាក់ម៉ាស់ពេលលោកចាក់វ៉ាក់សាំងមែនឬទេ?
Fact Check By: Kakada SimResult: Misleading
