ចម្លាក់នានា ត្រូវបានសាងសង់ឡើងដាក់នៅតាមទីសាធារណៈនានានៅតាមបណ្ដានានានៅទូទាំងប្រទេស ដែលមានទាំងចម្លាក់វីរជន ចម្លាក់ទេវតាមជំនឿសាសនា និងចម្លាក់ផ្សេងទៀតដែលឆ្លុះបញ្ចាំងសក្កានុពលទីតាំងភូមិសាស្ត្រជាដើម។ ទន្ទឹមគ្នានេះ រូបថតចម្លាក់ពណ៌មាសមួយ ត្រូវបានបង្ហោះនៅលើបណ្ដាញសង្គមជាមួយការអះអាងថា ជារូបសំណាកព្រះបាទជ័យវរ្ម័នទី៧។ ទោះយ៉ាងណា ការផ្ទៀងផ្ទាត់របស់ Fact Crescendo Cambodia បានបង្ហាញថា ការអះអាងនេះ គឺមិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី០៧ ខែមិថុនា ឆ្នាំ២០២១កន្លងទៅថ្មីៗនេះ មានអ្នកប្រើហ្វេសប៊ុកម្នាក់ បង្ហោះរូបថតមួយសន្លឹកដែល បានបង្ហាញអំពីទិដ្ឋភាពរូបសំណាកបដិមាមួយកន្លែង។ អ្នកប្រើហ្វេសប៊ុកដដែលនេះ ក៏បានបញ្ជាក់អះអាងផងដែរថា ចម្លាក់នេះ គឺជារូបសំណាកព្រះបាទជ័យវរ្ម័នទី៧។
រូបថតជាមួយសំណេរនេះត្រូវបានចែករំលែកបន្តៗគ្នាជាច្រើនដង រួមជាមួយនឹងការចុចគាំទ្រពីសំណាក់អ្នកប្រើ ហ្វេសប៊ុកនិយាយភាសាខ្មែរផងដែរ។
រូបភាពផ្ដាមចេញពីប៉ុស្តិ៍របស់អ្នកប្រើប្រាស់ដែលបានរៀបរាប់ជាភាសាខ្មែរថា «ស្អាតណាស់ រូបសំណាកព្រះបាទជ័យវរ្ម័នទី៧ 
ការត្រួតពិនិត្យការពិត
Fact Crescendo Cambodia បានចាប់ផ្តើមត្រួតពិនិត្យ និងផ្ទៀងផ្ទាត់រូបថតអះអាងខាងលើតាមរយៈការស្វែងរកព័ត៌មានទាក់ទងទៅនឹងរូបសំណាកទើបតែបានកសាងឡើងដែលនាំឱ្យយើងរកឃើញប្រភពមួយចំនួនដូចខាងក្រោម។
តាមរយៈសារបង្ហោះរបស់ទំព័រហ្វេសប៊ុក Khmer Architectural កាលពីថ្ងៃទី៣០ ខែឧសភា ឆ្នាំ២០២១ថ្មីៗនេះ ដែលបានចែកចាយរូបថតមួយសន្លឹកដែលមានទម្រង់ និងភិនភាគដូចគ្នាទាំងស្រុងទៅនឹងរូបថតដែលអ្នកប្រើហ្វេសប៊ុក បានអះអាងខាងលើ។ ទំព័រហ្វេសប៊ុកដដែលនេះក៏បានបញ្ជាក់ផងដែរអំពីឈ្មោះរូបសំណាកទាំងឡាយនេះ។
រូបភាពផ្ដាមចេញពីទំព័រហ្វេសប៊ុកខាងលើដែលបានសរសេររៀបរាប់ជាភាសាខ្មែរថា «#រូបចម្លាក់ធំៗចំនួនបី នឹងដាក់តម្លើងនៅតាមទីតាំងផ្សេងគ្នាក្នុងខេត្តព្រះសីហនុដែលរួមមាន: ១. ព្រះថោងនាងនាគ កម្ពស់ ២១ម៉ែត្រ ២. បដិមាព្រះសិវៈ និងព្រះនាងឧមាភគវតី ៣. បដិមាសីហរាជមុខបី»។
រូបភាពគម្រោងរូបសំណាកព្រះសិវៈដែលមានទម្រង់ដូចគ្នានេះក៏ត្រូវបានបង្ហោះ និងផ្សព្វផ្សាយផងដែរនៅក្នុងទំព័រ ហ្វេសប៊ុកលោក សាយ សំអាល់ កាលពីថ្ងៃទី២៧ ខែមករា ឆ្នាំ២០២០។ លោក សាយ សំអាល់ ត្រូវបានគេស្គាល់ថា ជារដ្ឋមន្រ្តីក្រសួងបរិស្ថានម្នាក់នៅក្នុងជួររាជរដ្ឋាភិបាលកម្ពុជា។ រូបលោកក៏បានលើកឡើងបន្ថែមផងដែរទាក់ទងទៅនឹង ទីតាំង និងទំហំរបស់រូបសំណាកមួយនេះ។
រូបភាពផ្ដាមចេញពីទំព័រហ្វេសប៊ុកខាងលើដែលបានសរសេររៀបរាប់ជាភាសាខ្មែរថា «រង្វង់មូលព្រះសិវៈ ស្ថិតនៅចំណុចប្រសព្វគ្នារវាងមហាវិថីរាម និងមហាវិថីឆ្នេររាម។ បដិមាព្រះសិវៈនិងព្រះនាងឧមាភគវតី ធ្វើពីលោហធាតុ មានកម្ពស់ ៩ម គង់នៅលើបល្លង្កកម្ពស់ ៦,១៥០ម មានកម្ពស់សរុប ១៥,១៥០ម ជានិមិត្តរូបនៃការបង្កើតលោក និងតំណាងឲ្យសេចក្តីសុខ សុភមង្គល ភាពសុខសាន្ត និងសុខុដុមនីយកម្មក្នុងគ្រួសារ និងសង្គម»។
តាមរយៈគេហទំព័រសារព័ត៌មានមួយផ្សេងទៀត ក៏បានចុះផ្សព្វផ្សាយដូចគ្នាកាលពីព្រឹកថ្ងៃទី០៨ ខែមិថុនា ឆ្នាំ២០២១នេះ អំពីរូបសំណាកទាំងបី ដែលតំណាងឱ្យខេត្តព្រះសីហនុ។ ក្នុងអត្ថបទដដែលនេះ ក៏បានបញ្ជាក់ផងដែរ ទាក់ទងទៅនឹងឈ្មោះ និងទំហំនៃរូបសំណាកទាំងបីនេះដែលក្នុងនេះក៏មានរូបសំណាកព្រះសិវៈ។
រូបភាពផ្ដាមចេញពីគេហទំព័រ Kampuchea Thmey News Report ដែលបានសរសេររៀបរាប់ចំណងជើងជាភាសាខ្មែរថា «កូនខ្មែរគួរដឹង រូបសំណាកកម្ពស់ ២១ ម៉ែត្រ តំណាងខេត្តព្រះសីហនុ កំពុងត្រៀមដំឡើងជិតរួចរាល់ហើយ»។
Kampuchea Thmey News Report | Archived Link
ដើម្បីពិនិត្យ និងផ្ទៀងផ្ទាត់ឱ្យកាន់តែច្បាស់លាស់ថែមទៀត Fact Crescendo Cambodia ក៏បានរកឃើញនូវរូបថតបដិមា ដែលជាគំរូដើមនៃរូបសំណាកដែលទើបនឹងសាងសង់នេះ តាមរយៈការស្វែងរករូបថតដែលទាក់ទងទៅនឹងព្រះសិវៈ។
រូបភាពផ្ដាមចេញពីទំព័រហ្វេសប៊ុក មរតកកម្ពុជា ដែលបានរៀបរាប់ថា«ព្រះសិវៈជាអាទិទេពធំមួយក្នុងចំណោមអាទិទេព ធំៗទាំងបីក្នុងព្រហ្មណ៍សាសនា។ ព្រះសិវៈ មានន័យថាក្សេមក្សាន្ដ ករុណា។ ព្រះសិវៈកើតឡើងអំពីតំណក់លោហិត ដែលស្រក់ចុះចាកចិញ្ចើមព្រះព្រហ្ម។ ព្រះសិវៈ ជាអាទិទេពសាងលោកផង និងបំផ្លាញលោកផង»។
សន្និដ្ឋាន (Conclusion)
Fact Crescendo Cambodia បានរកឃើញថា ការអះអាងដូចបានរៀបរាប់ខាងលេីនេះ គឺមិនត្រឹមត្រូវនោះឡេីយ។ រូបថតមួយសន្លឹកនេះ មិនមែនជាទិដ្ឋភាពរូបសំណាកព្រះបាទជ័យវរ្ម័នទី៧ ដែលស្ថិតនៅក្នុងខេត្តព្រះសីហនុ ប្រទេសកម្ពុជានោះទេ។ ការពិតរូបថតមួយសន្លឹកនេះ គឺជារូបសំណាកព្រះសិវៈ និងព្រះនាងឧមាភគវតី ដែលមានទីតាំងស្ថិតចំណុចប្រសព្វគ្នារវាងមហាវិថីរាម និងមហាវិថីឆ្នេររាម ខេត្តព្រះសីហនុ។
Title:តើចម្លាក់នេះជារូបសំណាកព្រះបាទជ័យវរ្ម័នទី៧មែនទេ?
Fact Check By: Kakada SimResult: False
