វីដេអូឃ្លីបខ្លារខិន២ក្បាល ត្រូវបានភ្ជាប់មិនត្រឹមត្រូវទៅនឹងព្រឹត្តិការណ៌ថ្មីៗនៅកម្ពុជា
ថ្មីៗនេះ មានព័ត៌មានផ្សាយថា ឆ្កែជាច្រើនក្បាលរបស់អ្នកភូមិ បានងាប់ជាបន្តបន្ទាប់គ្នានៅខេត្តព្រៃវែង។ បន្ទាប់មក ក៏មានវីដេអូមួយដែលបង្ហាញខ្លាពីរក្បាលព្យាយាមប្រហារឆ្កែនៅក្នុងទ្រុងនោះ ត្រូវបានគេបង្ហោះលើបណ្ដាញសង្គមជាមួយការអះអាងថា មូលហេតុនៃការងាប់ឆ្កែច្រើនក្បាលនៅព្រៃវែង គឺបណ្ដាលមកពីការវាយប្រហាររបស់ខ្លា។ វីដេអូឃ្លីបនេះ ត្រូវបានចែករំលែកបន្តព្រោងព្រាតពីសំណាក់អ្នកប្រើប្រាស់ហ្វេសប៊ុក។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia រកឃើញថា ការអះអាងនេះ គឺមិនត្រឹមត្រូវនោះឡើយ។
ការអះអាងលើបណ្ដាញសង្គម
វីដេអូឃ្លីបមួយមានរយៈពេល ១៩វិនាទី ដែលបង្ហាញសត្វខ្លាពីរក្បាលព្យាយាប្រហារឆ្កែនៅក្នុងទ្រុង ត្រូវបានគេបង្ហោះនៅលើបណ្ដាញសង្គមជាមួយការអះអាងថា សត្វខ្លានេះបានសម្លាប់ឆ្កែជាច្រើនក្បាលរបស់អ្នកភូមិនៅក្នុងខេត្តព្រៃវែងនាពេលថ្មីៗនេះ។
វីដេអូដែលភ្ជាប់មកជាមួយព័ត៌មានបែបនេះ ត្រូវបានចែករំលែកតៗគ្នាជាច្រើនដង រួមជាមួយនឹងប្រតិកម្ម និងការបញ្ចេញមតិចម្រុះពីសំណាក់អ្នកប្រើប្រាស់សង្គមហ្វេសប៊ុក។
ខាងក្រោមនេះ គឺជាវីដេអូឃ្លីបផ្ដាមចេញពីទំព័រហ្វេសប៊ុកខាងលើ ដែលបានសរសេររៀបរាប់ថា «មូលហេតុឃើញហើយ ឆ្កែបានងាប់ ជាបន្តបន្ទាប់ដោយសារអា ២ក្បាលនេះសោះ»។
ដូចគ្នានេះ ការអះអាងដោយភ្ជាប់ទៅនឹងវីដេអូខាងលើ ក៏ត្រូវបានរកឃើញ និងបង្ហោះផងដែរកាលពីពេលថ្មីៗនេះ ដោយមានចំនួនអ្នកចែកចាយជាច្រើនដង។
វីដេអូឃ្លីបភ្ជាប់ដោយការអះអាងបែបនេះ ត្រូវបានបង្ហោះ និងរកឃើញនៅលើបណ្ដាញសង្គមហ្វេសប៊ុក ជាច្រើនទៀតផងដែរ។
ខាងក្រោមនេះ គឺជាវីដេអូឃ្លីប ក៏ត្រូវបានអ្នកប្រើប្រាស់អះអាងថា ជាមូលហេតុដែលបណ្ដាលឱ្យមានសត្វឆ្កែងាប់បន្តបន្ទាប់ផងដែរ។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះ តាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោម។
ទិដ្ឋភាពវីដេអូឃ្លីបសត្វខ្លារខិនចំនួន ២ក្បាល ដែលបានលប និងព្យាយាមវាយប្រហារសត្វឆ្កែនៅក្នុងទ្រុង នៅក្នុងភូមិមួយកន្លែង ត្រូវបានរកឃើញ និងបង្ហោះនៅលើបណ្ដាញសង្គម Instagram កាលពីថ្ងៃទី១០ ខែមេសា ឆ្នាំ២០២៤កន្លងទៅ ដោយពុំបានអះអាងថា ទិដ្ឋភាពនេះ បានកើតឡើងនៅក្នុងប្រទេសកម្ពុជានោះឡើយ។
អ្នកប្រើប្រាស់ដដែលខាងលើ ពុំបានបញ្ជាក់ទីតាំងច្បាស់លាស់នោះទេ ដោយបានសរសេរត្រឹមថា នោះគឺជាទិដ្ឋភាពនៃសត្វខ្លារខិន បានព្យាយាមវាយប្រហារសត្វឆ្កែនៅក្នុងទ្រុងមួយក្បាល។
ខាងក្រោម គឺជាវីដេអូឃ្លីប បង្ហាញទិដ្ឋភាពដូចគ្នាទាំងស្រុង ដោយអ្នកប្រើប្រាស់ខាងលើ បានបង្ហោះមុន នឹងមានករណីបានកើតឡើងនៅកម្ពុជាមកម្ល៉េះ។
ក្រុមការងាររបស់ Fact Crescendo Cambodia ក៏បានរកឃើញថា អ្នកប្រើប្រាស់ដដែលខាងលើនេះ តែងតែបង្ហោះរូបថត និងវីដេអូឃ្លីបនានា ដែលបង្ហាញទិដ្ឋភាពនៃសត្វព្រៃប្រកួត និងវាយប្រហារគ្នាជាច្រើនផងដែរនៅលើទំព័ររបស់ខ្លួន។
Instagram Post | Archived Link
វីដេអូដូចគ្នា បែបនេះ ក៏ត្រូវបានរកឃើញ និងផ្សព្វផ្សាយនៅលើគេហទំព័រសារព័ត៌មាននានានៅក្នុងប្រទេសម៉ិកស៊ិក (Mexico) ផងដែរ ដោយភ្ជាប់ទៅនឹងការអះអាងស្រដៀងគ្នាទៅនឹងព្រឹត្តិការណ៌ថ្មីៗនៅកម្ពុជា។
ខាងក្រោមនេះ គឺជារូបភាពផ្ដាមចេញពីគេហទំព័រ El Heraldo de México កាលពីថ្ងៃទី២៤ ខែមិថុនា ឆ្នាំ២០២៤កន្លងទៅ ដែលសរសេរជាភាសាម៉ិកស៊ិក ឬប្រែសម្រួលជាភាសាខ្មែរ តាមរយៈកម្មវិធី Google Translate មានន័យថា «សត្វខ្លារខិនមួយគូ បានបង្កឱ្យមានភាពភ័យស្លន់ស្លោនៅតាមដងផ្លូវក្នុងទីក្រុង Cancun។ សត្វខ្លាទាំងនេះ បាននឹងកំពុងសម្លាប់សត្វឆ្កែ និងស៊ីជាអាហារ»។
El Heraldo de México News Report | Archived Link
ខាងក្រោមនេះ គឺជាការអះអាងមួយផ្សេងទៀត ដែលលើកឡើងថា ទិដ្ឋភាពនៃសត្វខ្លារខិនមួយគូ បានដើរចូលក្នុងភូមិរបស់អ្នកស្រុកនោះ គឺកើតឡើងនៅក្នុងទីក្រុង Cancun ប្រទេសម៉ិកស៊ិក។
X (formerly known as Twitter) | Archived Link
ដោយឡែក ក្រុមការងាររបស់ Fact Crescendo Cambodia ក៏បានរកឃើញថា វីដេអូដូចគ្នា ដែលត្រូវបានអះអាងថាកើតឡើងនៅក្នុងទីក្រុង Cancun ប្រទេសម៉ិកស៊ិកនោះ ក៏ត្រូវបានចាត់ទុកជាព័ត៌មានក្លែងក្លាយ និងមិនត្រឹមត្រូវផងដែរ ដោយគេហទំព័រសារព័ត៌មានរបស់ម៉ិកស៊ិក UnoTV។
គេហទំព័រដដែលខាងលើ កាលពីថ្ងៃទី២៤ ខែមិថុនា ឆ្នាំ២០២៤កន្លងទៅនេះ បានធ្វើការផ្ទៀងផ្ទាត់ ដោយបញ្ជាក់នៅក្នុងអត្ថបទរបស់ខ្លួន ជាភាសាម៉ិកស៊ិក ថាវីដេអូបង្ហាញទិដ្ឋភាពសត្វខ្លារខិន បានដើរ និងមានបំណងចង់ស៊ីសត្វឆ្កែជាអាហារនោះ មិនមែនកើតឡើងនៅក្នុងភូមិសាស្ត្រទីក្រុង Cancun ប្រទេសម៉ិកស៊ិកនោះទេ។
ការចែកចាយវីដេអូឃ្លីប និងការអះអាងខាងលើ ត្រូវបានកើតឡើង ក្រោយពីមានករណីនៃការងាប់សត្វឆ្កែជាបន្តបន្ទាប់ នៅក្នុងស្រុករមាសហែក ខេត្តស្វាយរៀង និងស្រុកកំចាយមារ ខេត្តព្រៃវែងនាពេលថ្មីៗនេះ។
ខាងក្រោម គឺជាអត្ថបទផ្ដាមចេញពីគេហទំព័រព័ត៌មាន CNC ដែលបានចុះផ្សព្វផ្សាយកាលពីថ្ងៃទី២៤ ខែមិថុនា ឆ្នាំ២០២៤ម្សិលមិញនេះ។
តាមរយៈរបាយការណ៌បឋមរបស់សមត្ថកិច្ចនគរបាលមូលដ្ឋាន ហេតុការណ៌សត្វឆ្កែរបស់ប្រជាពលរដ្ឋត្រូវបានសត្វមិនស្គាល់ខាំងាប់ ក្នុងសភាពមានស្នាមរបួសនៅបំពង់ក និងពោះ គឺបានកំពុងតែស្រាវជ្រាវបន្ថែម ដោយបច្ចុប្បន្ន សមត្ថកិច្ចបានដាក់ការសង្ស័យ ថាជាប្រភេទសត្វខ្លា ដែលរស់នៅក្នុងព្រៃក្រញូង និងព្រៃកាស្យា ក្នុងស្រុករមាសហែក ក្បែរព្រំប្រទល់ស្រុកកំចាយមារ។
CNC News Report | Archived Link
វីដេអូឃ្លីបដែលបានចែកចាយយ៉ាងផុសផុលនៅលើបណ្ដាញសង្គមខាងលើ ក៏ត្រូវបានកំពុងត្រួតពិនិត្យ និងស្វែងរកប្រភពដោយក្រសួងបរិស្ថានផងដែរ កាលពីពេលថ្មីៗនេះ។
ខាងក្រោមនេះ គឺជាវីដេអូរាយការណ៌ព័ត៌មានពីសា្ថនីយទូរទស្សន៍អប្សរា ស្តីអំពីការស្រាវជ្រាវការពិតរបស់ក្រសួងបរិស្ថានរបស់កម្ពុជា ពាក់ព័ន្ធទៅនឹងករណីនៃការងាប់សត្វឆ្កែជាច្រើនក្បាលនៅក្នុងភូមិសាស្រ្តខេត្តព្រៃវែង និងខេត្តស្វាយរៀង។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok WhatsApp
សន្និដ្ឋាន
Fact Crescendo Cambodia បានរកឃើញ ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ ការពិតវីដេអូឃ្លីបនេះ គឺត្រូវបានចែករំលែកនៅលើបណ្ដាញសង្គម Instagram តាំងពីដើមខែមេសា ដោយពុំបានជាប់ពាក់ព័ន្ធទៅនឹងហេតុការណ៍ថ្មីៗកើតឡើងនៅកម្ពុជានោះឡើយ។
Title: វីដេអូឃ្លីបខ្លារខិន២ក្បាល ត្រូវបានភ្ជាប់មិនត្រឹមត្រូវទៅនឹងព្រឹត្តិការណ៌ថ្មីៗនៅកម្ពុជា
Fact Check By: Kakada SimResult: Misleading