ខណៈដែលកម្ពុជាកំពុងប្រយុទ្ធនឹងការឆ្លងរីករាលដាលនៃមេរោគកូវីដ-១៩នោះ ក្រុមហ៊ុនឯកជននានាបានបរិច្ចាគថវិកាសម្រាប់ចូលរួមក្នុងបុព្វហេតុប្រយុទ្ធប្រឆាំងនឹងការរាតត្បាតនៃមេរោគកូវីដ-១៩នោះ។ ទន្ទឹមគ្នានេះដែរ តំណភ្ជាប់មួយ ត្រូវបានចែករំលែកតៗគ្នាលើបណ្ដាញសង្គមជាមួយការអះអាងថា ក្រុមហ៊ុនភេសជ្ជៈកម្ពុជាកូកាកូឡា បានបង្កើតមូលនិធិសុខមាលភាព និងបានផ្ដល់រង្វាន់តបស្នងដល់អ្នកបានចូលរួមដំណើរការស្រង់មតិតាមអនឡាញ។ ទោះជាយ៉ាងណា ការផ្ទៀងផ្ទាត់ការពិត រកឃើញថា ការអះអាងនេះ មិនមែនជាការពិតទេ។
ការអះអាងលើបណ្ដាញសង្គម
កាលពីថ្ងៃទី០២ ខែមិថុនា ឆ្នាំ២០២១ គណនីហ្វេសប៊ុក Sky Bot បានដាក់តំណភ្ជាប់មួយ(Link)ចូលទៅក្នុងគ្រុបបណ្ដាញសង្គមហ្វេសប៊ុកមួយ ដែលតំណបណ្ដាញនោះ ត្រូវបានសរសេរថា «មូលនិធិសុខុមាលភាពកូកា-កូឡា»។
នៅពេលចុចទៅលើតំណភ្ជាប់មួយនេះ វាក៏បង្ហាញនូវផ្ទាំងមួយដែលណែនាំអំពីការផ្ដល់រង្វាន់សម្រាប់អ្នកចូលរួមស្ទង់មតិឆ្លើយតបនឹងសំណួរចំនួន ៤។ ខាងក្រោមនេះ គឺជារូបភាពផ្ដាមចេញពីវេបសាយមួយនេះ បង្ហាញដូចខាងក្រោមនេះ។
ការពិនិត្យការពិត
Fact Crescendo Cambodia បានចោទសួរថា តើនេះគឺជាការពិតឬយ៉ាងណា ហើយចាប់ផ្ដើមផ្ទៀងផ្ទាត់ការពិតតាមរយៈពិនិត្យមើលការបកស្រាយរបស់ក្រុមហ៊ុនកូកាកូឡាប្រចាំប្រទេសកម្ពុជា និងស្ថាប័នជំនាញសន្តិសុខប្រព័ន្ធអ៊ិនធឹណិត។
នៅលើទំព័រហ្វេសប៊ុករបស់ខ្លួនកាលពីរសៀលថ្ងៃទី០៣ ខែមិថុនា ឆ្នាំ២០២១ ក្រុមហ៊ុនភេសជ្ជៈកម្ពុជា(កូកា-កូឡា) បានប្រកាសច្រានចោលនូវដំណើរការស្ទង់មតិតាមប្រព័ន្ធអនឡាញមួយនេះ ដោយនិយាយថា ក្រុមហ៊ុន«មិនជាប់ពាក់ព័ន្ធនឹងសកម្មភាពណាមួយក្នុងគេហទំព័រសម្រង់មតិ»នោះឡើយ។
នាយកដ្ឋានព័ត៌មានវិទ្យានៃក្រសួងមហាផ្ទៃ ដែលត្រួតពិនិត្យលើបទល្មើសតាមប្រព័ន្ធអ៊ិនធឹណិត បានបញ្ជាក់ថា តំណភ្ជាប់នៃការស្រង់មតិនេះ គឺជាល្បិចបោកបញ្ឆោត ដែលអាចយកលួចព័ត៌មានផ្ទាល់ខ្លួន និងចម្លងមេរោគទៅអ្នកចុចលើតំណភ្ជាប់មួយនេះ។
សន្និដ្ឋាន
Fact Crescendo Cambodia រកឃើញថា ដំណើរការស្ទង់មតិតាមអនឡាញនេះ មិនមែនជាការពិតនោះឡើយ។ ក្រុមហ៊ុនកូកាកូឡានៅកម្ពុជា មិនបានរៀបចំការស្រង់មតិតាមអនឡាញនោះឡើយ ហើយក្រសួងមហាផ្ទៃបានរកឃើញថា ការស្រង់មតិអនឡាញនេះ គឺជាល្បិចបោកបញ្ឆោត។
Title:តើក្រុមហ៊ុនកូកាកូឡានៅកម្ពុជាផ្ដល់រង្វាន់ជាថ្នូរនឹងការចូលរួមស្រង់មតិតាមអនឡាញមែនទេ?
Fact Check By: Jay UdomResult: False
