សំណង់នៅក្នុងវត្តមួយនៃខេត្តបុរីរម្យ ប្រទេសថៃនាពេលថ្មីៗនេះ បានធ្វើឲ្យប្រជាពលរដ្ឋកម្ពុជាប្រតិកម្ម និងបានលើកឡើងថា សំណង់នៃប្រាសាទថ្មីនេះ គឺសាងសង់ឡើងដោយចម្លងតាមរចនាបថស្ថាបត្យកម្មដូចទៅនឹងប្រាសាទអង្គរវត្តរបស់កម្ពុជា។ ការមានប្រតិកម្មនេះបានក្លាយទៅជាប្រធានបទនៃការជជែកវែកញែក ដេញដោល និងចែករំលែកនៅលើបណ្ដាញសង្គមកម្ពុជាយ៉ាងផុសផុល។
ជាក់ស្តែង មានរូបថតបួនសន្លឹកបង្ហាញប្រាសាទបុរាណ ដែលត្រូវបានអ្នកប្រើប្រាស់បណ្ដាញសង្គមអះអាងថា ជាប្រាសាទអង្គរវត្តក្នុងឆ្នាំ១៩៣១។
ទោះជាយ៉ាងណា ការត្រួតពិនិត្យ និងផ្ទៀងផ្ទាត់ការពិតរបស់ Fact Crescendo Cambodia បានរកឃើញថា ការអះអាងនេះ គឺធ្វើឲ្យមានការយល់ច្រឡំ។
ការអះអាងលើបណ្តាញសង្គម
កាលពីល្ងាចថ្ងៃទី០៩ ខែកក្កដា ឆ្នាំ២០២១ថ្មីៗនេះ មានអ្នកប្រើហ្វេសប៊ុកម្នាក់ បានបង្ហោះរូបថតចំនួនបួនសន្លឹក បង្ហាញអំពីទិដ្ឋភាពប្រាសាទបុរាណមួយដែលមានទម្រង់ និងភិនភាគដូចទៅនឹងប្រាសាទអង្គរវត្តបេះបិទ។ អ្នកប្រើប្រាស់ដដែលនេះក៏បានអះអាងនៅក្នុងសំណេររបស់ខ្លួនផងដែរថា នេះគឺជាប្រាសាទអង្គរវត្តកាលពីឆ្នាំ១៩៣១។
រូបថតទាំងបួនសន្លឹកនេះ ត្រូវបានចែករំលែកតៗគ្នាជាច្រើនដង រួមជាមួយនឹងប្រតិកម្ម និងការបញ្ចេញមតិចម្រុះពីសំណាក់អ្នកប្រើហ្វេសប៊ុកនិយាយភាសាខ្មែរជាច្រើនដង។
រូបភាពផ្ដាមចេញពីប៉ុស្តិ៍របស់អ្នកប្រើប្រាស់ដែលបានរៀបរាប់ថា «រូបភាពកម្រ ស៊ែរម្នាក់មួយផង ប្រាសាទអង្គរវត្តក្នុងឆ្នាំ ១៩៣១»។
រូបថតទាំងបួនសន្លឹកដដែលនេះ ក៏ត្រូវបានទំព័រហ្វេសប៊ុកដទៃទៀត បង្ហោះ និងចែករំលែកបន្តផងដែរនៅក្នុងបណ្តាញសង្គមហ្វេសប៊ុកកាលពីព្រឹកថ្ងៃទី០៩ ខែកក្កដា ឆ្នាំ២០២១ ជាមួយនឹងសំណេរជាភាសាខ្មែរថា «ប្រាសាទអង្គរវត្តក្នុងឆ្នាំ ១៩៣១ អង្គរវត្តជារបស់ខ្មែរ»។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាល់លើរូបភាពនេះតាមរយៈការដំណើរការកម្មវិធីស្វែងរករូបថតរបស់ក្រុមហ៊ុន Google ដែលនាំឱ្យយើងជួបប្រទះនូវប្រភព និងខ្លឹមសាររូបថតនៃច្បាប់ដើមមួយចំនួន។
រូបថតទិដ្ឋភាពប្រាសាទដែលមានទម្រង់ និងភិនភាគសណ្ឋានដូចទៅនឹងប្រាសាទអង្គរវត្តនៅក្នុងប្រទេសកម្ពុជានេះ ត្រូវបានរកឃើញ និងផ្សព្វផ្សាយបង្ហោះនៅលើគេហទំព័រអន្តរជាតិមួយ។ នៅក្នុងគេហទំព័រដដែល ក៏បានបញ្ជាក់ថា រូបថតទាំងឡាយនេះ គឺជាទិដ្ឋភាពប្រាសាទអង្គរវត្តចម្លងដែលបានធ្វើឡើង និងសាងសង់ដោយប្រទេសបារាំង ក្នុងពិធីតាំងពិព័រណ៍អាណានិគមអន្តរជាតិអំឡុងឆ្នាំ១៩៣១។
រូបភាពផ្តាមចេញពីគេហទំព័រដែលមានចំណងជើងរៀបរាប់ជាភាសាអង់គ្លេសថា «French replica of Angkor Wat during the 1931 Exposition Colonial de Paris from album by Marcel Braun» ប្រែជាភាសាខ្មែរមានន័យថា «»។
គេហទំព័រ John Coulthart ក៏បានផ្សព្វផ្សាយ និងបង្ហោះអំពីទិដ្ឋភាពសំណង់ចម្លងតាមរចនាបថប្រាសាទអង្គរវត្ត ដែលបានសាងសាង់ឡើងនៅក្នុងទីក្រុងប៉ារីស ប្រទេសបារាំងជាច្រើនសន្លឹកផងដែរ។ លោក John Coulthart ត្រូវបានគេស្គាល់ថាជា សិល្បករ អ្នកគូររូប អ្នកនិពន្ធ និងអ្នករចនាក្រាហ្វិចជនជាតិអង់គ្លេសម្នាក់ ដែលបានផលិតសៀវភៅ និងផ្ទាំងរូបភាពជាច្រើន។
រូបភាពផ្តាមចេញពីគេហទំព័រ ដែលបានបង្ហាញអំពីទិដ្ឋភាពសំណង់ប្រាសាទចម្លងរបស់អង្គរវត្តនាទីក្រុងប៉ារីស។
រូបភាពផ្តាមនៃទិដ្ឋភាពប្រាសាទអង្គរវត្តចម្លងមើលពីលើអាកាស។
John Coulthart Link | Archived Link
សំណង់នៃប្រាសាទចម្លងរបស់អង្គរវត្តនេះ ក៏ត្រូវបានផ្សព្វផ្សាយ និងបង្ហោះផងដែរនៅក្នុងគេហទំព័រ Angkor DataBase ដែលបានបង្ហាញអំពីទិដ្ឋភាពជារួមរបស់ប្រាសាទក្នុងអំឡុងពេលកំពុងសាងសង់ និងក្រោយពេលសាងសង់រួចរាល់។
រូបភាពផ្តាមចេញពីគេហទំព័រ ដែលបានសរសេររៀបរាប់ជាភាសាអង់គ្លេស «Angkor Wat Replica In Vincennes for the 1931 Colonial International Exhibition, Paris» ឬប្រែជាភាសាខ្មែរថា «ប្រាសាទអង្គរចម្លងនៅក្នុងសង្កាត់ Vincennes ឆ្នាំ១៩៣១ នាទីក្រុងប៉ារីស»។
រូបភាពផ្តាមនៃទិដ្ឋភាពនៃការដ្ឋានសំណង់ប្រាសាទអង្គរវត្តចម្លងនៅក្នុងទីក្រុងប៉ារីស ប្រទេសបារាំង។
Angkor DataBase Link | Archived Link
សន្និដ្ឋាន
Fact Crescendo Cambodia រកឃើញថា ការបង្ហោះរូបថតជាមួយនឹងការអះអាងដូចបានរៀបរាប់ខាងលើនេះ គឺធ្វើឲ្យអ្នកប្រើប្រាស់មានការយល់ច្រឡំ។ រូបថតទាំងបួនសន្លឹកនេះ មិនមែនជាទិដ្ឋភាពប្រាសាទអង្គរវត្តពិតប្រាកដដែលស្ថិតនៅក្នុងខេត្តសៀមរាប ប្រទេសកម្ពុជាយើងនោះទេ។ ការពិត រូបថតប្រាសាទទាំងឡាយនេះ គឺជាទិដ្ឋភាពប្រាសាទអង្គរវត្ត ដែលរដ្ឋាភិបាលអាណានិគមបារាំងបានសាងសង់សម្រាប់ពិព័រណ៍អាណានិគមអន្តរជាតិរបស់ខ្លួននៅទីក្រុងប៉ារីសកាលពីឆ្នាំ១៩៣១។
Title:តើនេះគឺជាប្រាសាទអង្គរវត្តនៅក្នុងខេត្តសៀមរាបអំឡុងឆ្នាំ១៩៣១មែនដែរឬទេ?
Fact Check By: Kakada SimResult: Misleading
