សំណើច្បាប់មួយសម្រាប់ដាក់ទណ្ឌកម្មរដ្ឋាភិបាលដឹកនាំដោយលោកនាយករដ្ឋមន្ត្រី ហ៊ុន សែន ដើម្បីស្ដារស្ថានភាពប្រជាធិបតេយ្យ និងការគោរពសិទ្ធិមនុស្សនៅកម្ពុជាឡើងវិញនោះ ត្រូវបានស្នើឡើងដោយសមាជិកព្រឹទ្ធសភាអាមេរិកតាំងពីឆ្នាំមុន។ ទន្ទឹមគ្នានេះ ការអះអាងមួយនៅលើបណ្ដាញសង្គម បានលើកឡើងថា សំណើច្បាប់មួយនេះ ត្រូវបានស្ថាប័នព្រឹទ្ធសភាអាមេរិកអនុម័តជាផ្លូវការហើយកាលពីថ្ងៃសុក្រសប្ដាហ៍មុន។ ការអះអាងនេះ ត្រូវបានចែករំលែកតគ្នាជាច្រើនដងនៅលើបណ្ដាញសង្គម។ ទោះជាយ៉ាងណា ការផ្ទៀងផ្ទាត់របស់យើង រកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
ការអះអាងមួយនៅលើបណ្ដាញសង្គម បានលើកឡើងថា សំណើច្បាប់មួយរបស់សហរដ្ឋអាមេរិកសម្រាប់ដាក់ទណ្ឌកម្មលើរបបដឹកនាំរបស់លោកនាយករដ្ឋមន្ត្រី ហ៊ុន សែន ត្រូវបានព្រឹទ្ធសភាអាមេរិកអនុម័តជាផ្លូវការហើយកាលពីថ្ងៃសុក្រសប្ដាហ៍មុន។
ការអះអាងនេះ ត្រូវបានចែករំលែកបន្តជាច្រើនដងពីសំណាក់អ្នកប្រើប្រាស់បណ្ដាញសង្គមនិយាយភាសាខ្មែរ ហើយអ្នកប្រើប្រាស់ហ្វេសប៊ុកមួយចំនួន ក៏បានបញ្ចេញមតិសាទរចំពោះព័ត៌មាននេះផងដែរ។
ខាងក្រោមនេះ គឺជារូបភាពផ្ដាមចេញពីអះអាងនៅលើបណ្ដាញសង្គមហ្វេសប៊ុក ដែលរៀបរាប់ថា «ថ្ងៃសុក្រុ ទី២៩ កក្កដា ឆ្នាំ២០២២ ព្រឹទ្ធសភាសហរដ្ឋអាមេរិកាំង បានអនុម័តច្បាប់ជាផ្លូវការហើយ S 3052 ច្បាប់នេះសម្រាប់ដាក់ទណ្ឌកម្មមេដឹកនាំផ្ដាច់ការ ហ៊ុន សែន ចប់ហើយប្ដូរ។ សប្បាយចិត្តណាស់ខ្ញុំសូមរាំងលេងម្ដងហើយៗ»។
អ្នកបង្ហោះការអះអាងបែបនេះនៅលើបណ្ដាញសង្គមហ្វេសប៊ុក ក៏បានផ្សាយជាវីដេអូផងដែរ ដែលនិយាយថា ព្រឹទ្ធសភាអាមេរិកបានអនុម័តសំណើច្បាប់មួយឈ្មោះថា «Cambodia Democracy and Human Rights Act» សម្រាប់ដាក់ទណ្ឌកម្មលើប្រទេសកម្ពុជា។
ការត្រួតពិនិត្យការពិត
Fact Crescendo Cambodia បានផ្ទៀងផ្ទាត់ទៅលើការអះអាងនេះតាមរយៈការសាកសួរព័ត៌មានទៅតំណាងរដ្ឋាភិបាលអាមេរិកប្រចាំនៅកម្ពុជា និងការពិនិត្យមើលដំណើរវិវត្តនៃសំណើច្បាប់ស្ដីពីលទ្ធិប្រជាធិបតេយ្យ និងសិទ្ធិមនុស្ស ដែលនាំឱ្យយើងរកឃើញការពិតដូចខាងក្រោមនេះ។
ទាក់ទងនឹងការអះអាងនេះ Fact Crescendo Cambodia បានស្វែងរកការបញ្ជាក់ពីស្ថានទូតអាមេរិកប្រចាំកម្ពុជាផងដែរនៅថ្ងៃចន្ទនេះ ប៉ុន្តែ មន្ត្រីនាំពាក្យស្ថានទូតអាមេរិក បានប្រាប់ឱ្យសាកសួរទៅសមាជិកព្រឹទ្ធសភាអាមេរិក ដែលបានស្នើច្បាប់នេះឡើង។
សំណើច្បាប់ស្ដីពី«លទ្ធិប្រជាធិបតេយ្យ និងសិទ្ធិមនុស្សច្បាប់» ឬជាភាសាអង់គ្លេសហៅថា Cambodia Democracy and Human Rights Act ត្រូវបានស្នើឡើងដោយសមាជិកព្រឹទ្ធសភាអាមេរិកមកពីគណបក្សប្រជាធិបតេយ្យ លោក Edward J. Markey និងសមាជិកព្រឹទ្ធសភាអាមេរិកមួយរូបទៀតមកពីគណបក្សសាធារណរដ្ឋ លោក Marco Rubio កាលពីថ្ងៃទី២១ ខែតុលា ឆ្នាំ២០២១កន្លងមក។
គេហទំព័រសភាអាមេរិក (www.congress.gov) ដែលដាក់បង្ហាញជាសាធារណៈនូវដំណើរវិវត្តជាជំហ៊ាននៃសំណើរច្បាប់នានានៅក្នុងស្ថាប័នសភាអាមេរិកនោះ បានបង្ហាញឱ្យឃើញថា សំណើរច្បាប់សម្រាប់ស្ដារលទ្ធិប្រជាធិបតេយ្យ និងការគោរពសិទ្ធិមនុស្សឡើងវិញនៅកម្ពុជានោះ កំពុងស្ថិតនៅក្នុងដំណាក់កាលដំបូងនៅឡើយ ឬស្ថិតនៅឯគណៈកម្មាធិការកិច្ចការបរទេសរបស់ព្រឹទ្ធសភាអាមេរិកនៅឡើយ។
សមាជិកព្រឹទ្ធសភាអាមេរិក លោក Marco Rubio បានបញ្ជាក់នៅក្នុងសេចក្ដីថ្លែងការណ៍មួយថា សំណើច្បាប់សម្រាប់ដាក់ទណ្ឌកម្មកម្ពុជានេះ ទទួលបានការអនុម័តយល់ព្រមពីសមាជិកទាំង ១៥រូបនៃគណៈកម្មាធិការកិច្ចការបរទេសរបស់ព្រឹទ្ធសភាអាមេរិកកាលពីថ្ងៃទី១៩ ខែកក្កដាកន្លងមកនេះ។
Marco Rubio’s Press Release | Archived Link
ព័ត៌មាននៅលើគេហទំព័ររបស់ព្រឹទ្ធសភាអាមេរិក បង្ហាញឱ្យដឹងទៀតថា សំណើច្បាប់ស្ដីពីលទ្ធិប្រជាធិបតេយ្យ និងសិទ្ធិមនុស្សកម្ពុជា ឬសំណើច្បាប់មានលេខសម្គាល់ S.3052 ត្រូវបានដាក់បញ្ចូលទៅក្នុងប្រតិទិនរបស់ព្រឹទ្ធសភាអាមេរិកហើយកាលពីថ្ងៃទី២១ ខែកក្កដាកន្លងមកនេះ ប៉ុន្តែ របៀបវារៈនៃការពិភាក្សា និងអនុម័តសំណើច្បាប់មួយនេះដោយសភាពេញអង្គ មិនទាន់ត្រូវបានកំណត់ពេលវេលានៅឡើយទេ។
ជាងនេះទៀត កាលពីថ្ងៃទី២២ ខែកក្កដាកន្លងមកនេះ សារព័ត៌មានសំឡេងសហរដ្ឋអាមេរិក VOA បានធ្វើសេចក្ដីរាយការណ៍ថា សំណើច្បាប់ស្ដីពីលទ្ធិប្រជាធិបតេយ្យ និងសិទ្ធិមនុស្សកម្ពុជានេះ ត្រូវបានអនុម័តដោយគណៈកម្មាធិការកិច្ចការបរទេស នៃស្ថាប័នព្រឹទ្ធសភាអាមេរិក។
សូមទស្សនាសេចក្ដីរាយការណ៍លម្អិតរបស់សារព័ត៌មានសំឡេងសហរដ្ឋអាមេរិក VOA នៅខាងក្រោមនេះ។
សន្និដ្ឋាន
Fact Crescendo Cambodia បានរកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ រហូតមកដល់ពេលនេះ សំណើច្បាប់ស្ដីពីលទ្ធិប្រជាធិបតេយ្យ និងសិទ្ធិមនុស្សកម្ពុជា (Cambodia Democracy and Human Rights Act) មិនទាន់ត្រូវបានព្រឹទ្ធសភាអាមេរិកអនុម័តនៅឡើយទេ។ សំណើច្បាប់មានលេខសម្គាល់ S.3052 នេះ ទើបតែត្រូវបានអនុម័តដោយគណៈកម្មាធិការកិច្ចការបរទេសរបស់ព្រឹទ្ធសភាអាមេរិក កាលពីថ្ងៃទី១៩ ខែកក្កដាកន្លងមកនេះ ហើយត្រូវបានបញ្ជូនទៅស្ថាប័នព្រឹទ្ធសភាកាលពីថ្ងៃទី២១ ខែកក្កដា។
Title:សំណើច្បាប់ដាក់ទណ្ឌកម្មកម្ពុជាទើបឆ្លងផុតពីគណៈកម្មាធិការកិច្ចការបរទេសព្រឹទ្ធសភាអាមេរិក
Fact Check By: Jay UdomResult: False
