ខណៈដែលបណ្ដាញសង្គមហ្វេសប៊ុកបើកឱ្យមានការផ្សព្វផ្សាយពាណិជ្ជកម្មនោះ ម្សៅដោះគោមួយប្រភេទយីហោ Neysure Gold ត្រូវបានគេផ្សព្វផ្សាយព្រោងព្រាតនៅលើបណ្ដាញសង្គមមួយនេះអស់រយៈពេលជាច្រើនខែមកហើយ។ វីដេអូពាណិជ្ជកម្ម បានអះអាងថា ផលិតផលមួយនេះអាចព្យាបាលជំងឺតម្រងនោមដោយមានប្រសិទ្ធភាព។ វីដេអូពាណិជ្ជកម្ម បានទាក់ទងអ្នកប្រើប្រាស់បណ្ដាញសង្គមជាច្រើន។ ទោះជាយ៉ាងណា ការស៊ើបអង្កេតរបស់យើង រកឃើញថា ការអះអាងបែបនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
ម្សៅដោះគោយីហៅ Neysure Gold ត្រូវបានគេផ្សព្វផ្សាយលក់ព្រោងព្រាតនៅលើបណ្ដាញសង្គម ដោយសំដៅទៅរកអតិថិជនជាអ្នកប្រើប្រាស់បណ្ដាញសង្គមនៅតាមបណ្ដាប្រទេសក្នុងតំបន់ ក្នុងនោះមានប្រទេសកម្ពុជា ថៃ ភូមា និងហ្វីលីពីន។
នៅក្នុងវីដេអូផ្សាយពាណិជ្ជកម្មនានា មានការអះអាងថា ម្សៅដោះគោមួយនេះ អាចព្យាបាលជំងឺផ្សេងៗនៅក្នុងរាងកាយរបស់មនុស្ស ក្នុងនោះមានទាំងជំងឺតម្រងនោមផងដែរ។
ការផ្សាយពាណិជ្ជកម្ម អះអាងថា ផលិតផលនេះទទួលបានការអនុញ្ញាត និងការទទួលស្គាល់គុណភាពពីស្ថាប័នសុខាភិបាលនៅតាមបណ្ដាប្រទេសនានា ដូចជាសហរដ្ឋអាមេរិក និងក្រសួងសុខាភិបាលរបស់កម្ពុជាជាដើម។
ខាងក្រោមនេះ គឺជាវីដេអូទាំងស្រុងនៃការផ្សាយពាណិជ្ជកម្មម្សៅដោះគោ Neysure Gold ជាភាសាខ្មែរ ដែលសំដៅទៅរកអតិថិជនជាអ្នកប្រើប្រាស់បណ្ដាញសង្គមកម្ពុជា។
ក្រៅពីវីដេអូខាងលើនេះ គេក៏អាចរកមើលការផ្សាយពាណិជ្ជកម្មផលិតផល Neysure Gold ជាភាសាខ្មែរផ្សេងទៀត ដែលសំដៅទៅរកអតិថិជននៅទីផ្សារកម្ពុជា តាមរយៈតំណភ្ជាប់នៅទីនេះ (archived link) និងតំណភ្ជាប់មួយទៀតនៅទីនេះ (archived link)។
ផលិតផលយីហោមួយនេះ ក៏ត្រូវបានផ្សាយពាណិជ្ជកម្មជាភាសាអង់គ្លេស និងផ្សាយនៅលើបណ្ដាញសង្គមសំដៅទៅរកអតិថិជនជាអ្នកប្រើប្រាស់បណ្ដាញសង្គមហ្វីលីពីនផងដែរ។ សារពាណិជ្ជកម្មទាំងនោះ សុទ្ធតែអះអាងថា ផលិតផល Neysure Gold អាចព្យាបាលជំងឺតម្រងនោម គ្រួសក្នុងតម្រងនោម និងជំងឺផ្សេងទៀត ដូចជា សម្ពាធឈាមខ្ពស់ និងបញ្ហាផ្លូវភេទ។
ពាណិជ្ជកម្មរបស់ Neysure Gold បានអះអាងថា ផលិតផលនេះត្រូវបានផលិតឡើងដោយប្រើបច្ចេកវិទ្យាអាមេរិក និងមានការទទួលស្គាល់គុណភាពពីស្ថាប័នត្រួតពិនិត្យសុវត្ថិភាពចំណីអាហារ និងឱសថអាមេរិក (FDA)។
សូមមើលវីដេអូផ្សាយពាណិជ្ជកម្មទាំងស្រុងដែលមានអត្ថាធិប្បាយជាភាសាអង់គ្លេសដែលសំដៅទៅរកទីផ្សារប្រទេសហ្វីលីពីន។
ម្សៅដោះគោយីហោនេះ ក៏ត្រូវបានផ្សាយពាណិជ្ជកម្មនៅលើបណ្ដាញសង្គមប្រទេសថៃផងដែរ ដោយសំដៅទៅរកអតិថិជនជាអ្នកប្រើប្រាស់បណ្ដាញសង្គមថៃ។ ការផ្សាយពាណិជ្ជកម្ម បានបន្តលើកឡើងថា ផលិតផលនេះអាចព្យាបាលជំងឺតម្រងនោមរបស់មនុស្សយើង។
ខាងក្រោមនេះ គឺជាវីដេអូផ្សាយពាណិជ្ជកម្មទាំងស្រុងមានសំឡេងជាភាសាថៃដែលសំដៅទៅរកអតិថិជននៅក្នុងទីផ្សារប្រទេសថៃ។
ចំណែកវីដេអូខាងក្រោមនេះ គឺជាការផ្សាយពាណិជ្ជកម្មផលិតផល Neysure Gold ជាភាសាភូមា ដែលសំដៅទៅរកអតិថិជននៅក្នុងប្រទេសមីយ៉ាន់ម៉ា។
ការត្រួតពិនិត្យការពិត
Fact Crescendo បានចាប់ផ្ដើមត្រួតពិនិត្យ និងផ្ទៀងផ្ទាត់លើការផ្សព្វផ្សាយលក់ផលិតផលនេះតាមរយៈការពិនិត្យមើលប្រភពនានា ដែលនាំឱ្យយើងរកឃើញការពិតដូចខាងក្រោមនេះ។
បន្ទាប់ពីមានការអះអាងថា ផលិតផលនេះទទួលបានការអនុញ្ញាត និងការទទួលស្គាល់ពីក្រសួងសុខាភិបាលហើយនោះ យើងបានស្វែងរកការបញ្ជាក់ពីមន្ត្រីក្រសួងអំពីលេខបញ្ជីការ និងលិខិតអនុញ្ញាតឱ្យចែកចាយ និងលក់ផលិតផលមួយនេះនៅលើទីផ្សារប្រទេសកម្ពុជា។
ឆ្លើយតបនឹងការស្នើសុំការបញ្ជាក់ពី Fact Crescendo កាលពីថ្ងៃទី១៧ ខែតុលា ឆ្នាំ២០២៤ លោក អាំង ហុកស៊្រុន ប្រធានការិយាល័យសុវត្ថិភាពចំណីអាហារ នៃនាយកដ្ឋានឱសថ និងចំណីអាហារ បានបញ្ជាក់ថា ផលិតផល Neysure Gold នេះ ពុំមានលេខបញ្ជីការ និងលិខិតអនុញ្ញាតរបស់ក្រសួងសុខាភិបាលទេ។
លោក អាំង ហុកស៊្រុន បន្តថា ក្រសួងបានចាប់ផ្ដើមត្រួតពិនិត្យរកប្រភពដើមនៃផលិតផលនេះ និងចាត់វិធានការច្បាប់ប្រឆាំងនឹងការលក់ និងចែកចាយផលិតផលនេះនៅលើទីផ្សារប្រទេសកម្ពុជា។
នៅឯប្រទេសថៃឯណោះវិញ ស្ថាប័នគ្រប់គ្រងសុវត្ថិភាពចំណីអាហារ និងឱសថរបស់ប្រទេសនេះហៅកាត់ថា FDA បានបញ្ជាក់កាលពីខែមេសាកន្លងមកថា ម្សៅដោះគោយីហោនេះ ត្រូវបានលក់ និងចែកចាយដោយខុសច្បាប់ និងគ្មានការអនុញ្ញាតពីស្ថាប័ននេះនោះឡើយ។
ផ្ទុយទៅវិញ ស្ថាប័ន FDA របស់ថៃ បានបញ្ជាក់ថា ការអះអាងថា ផលិតផលនេះមានការទទួលស្គាល់ពី FDA នោះ គឺជាការក្លែងបន្លំដោយប្រើប្រាស់លេខបញ្ជីការរបស់ផលិតផលរបស់ក្រុមហ៊ុនផ្សេង។
និយ័តករសុវត្ថិភាពចំណីអាហារថៃ បានដាស់តឿនប្រជាជនថៃកុំឱ្យទិញផលិតផលម្សៅដោះគោខុសច្បាប់នេះ ដោយព្រមានពីហានិភ័យធ្លាក់ខ្លួនទៅជាជនរងគ្រោះនៃការផ្សាយពាណិជ្ជកម្មបំផ្លើសរបស់ផលិតផល Neysure Gold។
ខាងក្រោមនេះ គឺជារូបភាពផ្ដាមចេញពីសេចក្ដីជូនដំណឹងរបស់ FDA ថៃ នៅលើបណ្ដាញសង្គមកាលពីថ្ងៃទី២១ ខែមេសា ឆ្នាំ២០២៤ បន្ទាប់ពីបានឃើញការផ្សព្វផ្សាយព្រោងព្រាតនៅលើបណ្ដាញសង្គមនូវម្សៅដោះគោ Neysure Gold ដែលសំដៅទៅរកអតិថិជនថៃ។
ក្នុងសេចក្ដីជូនដំណឹងដដែលនោះ ស្ថាប័ន FDA ថៃ បានរាយការណ៍ថា អាជ្ញាធរថៃ បានចាប់ខ្លួនជនល្មើស ២ក្រុមដែលបានលក់ផលិតផលនេះដោយគ្មានលេខបញ្ជីការស្របច្បាប់ និងផ្សព្វផ្សាយបំផ្លើសហួសពីការពិត។
យោងតាមសេចក្ដីជូនដំណឹងនោះ មនុស្សដែលត្រូវបានអាជ្ញាធរថៃចាប់ខ្លួននោះ មានក្រុមឈ្មួញវៀតណាម និងបុគ្គលិកជាជនជាតិថៃ ដែលធ្វើការឱ្យឈ្មួញវៀតណាមទាំងនោះ។
ទោះជាយ៉ាងណា ស្ថាប័ន FDA ថៃ បញ្ជាក់បន្ថែមទៀតថា នៅមានបណ្ដាញជនជាតិវៀតណាមខុសច្បាប់បន្តផ្សព្វផ្សាយក្លែងបន្លំផលិតផលនេះនៅក្នុងប្រទេសថៃ ហើយអាជ្ញាធរថៃកំពុងបន្តស៊ើបអង្កេត និងស្រាវជ្រាវរកជនប្រព្រឹត្តខុសច្បាប់ទាំងនោះ។
ទន្ទឹមគ្នានេះដែរ មន្ទីរពេទ្យសិរីរាជ នៃសាកលវិទ្យាលម៉ាហិឌុល នៅក្នុងប្រទេសថៃ បញ្ជាក់ថា ស្ថាប័ននេះ និងគ្រូពេទ្យនៅស្ថាប័ននេះ មិនពាក់ព័ន្ធនឹងការផ្សាយពាណិជ្ជកម្មក្លែងបន្លំរបស់ផលិតផល Neysure Gold នោះឡើយ។
មន្ទីរពេទ្យដ៏ធំរបស់ថៃមួយនេះ បញ្ជាក់ថា តួសម្ដែងនៅក្នុងវីដេអូផ្សាយពាណិជ្ជកម្មនានា មិនមែនជាវេជ្ជបណ្ឌិត ឬបុគ្គលិកវេជ្ជសាស្ត្របម្រើការនៅមន្ទីរពេទ្យមួយនេះឡើយ។
មន្ទីរពេទ្យសិរីរាជ បញ្ជាក់ទៀតថា ការផ្សាយពាណិជ្ជកម្មផលិតផល Neysure Gold គឺជាទម្រង់មួយនៃព័ត៌មានក្លែងក្លាយ និងបានដាស់តឿនសាធារណជនកុំឱ្យជឿទៅតាមការផ្សាយពាណិជ្ជកម្មក្លែងបន្លំបែបនេះនៅលើបណ្ដាញសង្គម។
Siriraj Hospital Notice | Archived Link
ដោយសារតែផលិតផលនេះត្រូវបានផ្សាយពាណិជ្ជកម្មសំដៅទៅរកទីផ្សារហ្វីលីពីននោះ យើងបានស្វែងរកព័ត៌មាន និងភាពត្រឹមត្រូវតាមច្បាប់នៃផលិតផលនេះនៅលើគេហទំព័រសាធារណៈមួយរបស់ហ្វីលីពីន ដែលបើកឱ្យមហាជនចូលទៅរកព័ត៌មានផ្ទៀងផ្ទាត់អំពីមុខទំនិញចំណីអាហារ និងឱសថ។ ទោះជាយ៉ាងណា គ្មានព័ត៌មាន ឬកំណត់ត្រាណាមួយអំពីផលិតផលនេះនៅក្នុងគេហទំព័រមួយនេះឡើយ។
វីដេអូផ្សាយពាណិជ្ជកម្ម ក៏អះអាងថា ផលិតផល Neysure Gold នេះ ត្រូវបានទទួលស្គាល់គុណភាព និងការអនុញ្ញាតពីស្ថាប័នសុវត្ថិភាពចំណីអាហារ និងឱសថ (FDA) របស់អាមេរិកផងដែរ។ ប៉ុន្តែ បន្ទាប់ពីស្វែងរកយ៉ាងល្អិតល្អន់នៅលើគេហទំព័ររបស់ស្ថាប័ន FDA យើងរកពុំឃើញព័ត៌មាន ឬកំណត់ត្រាអំពីផលិតផលនេះឡើយ។
សំបកកំប៉ុងនៃផលិតផលនេះ បញ្ជាក់ថា ម្សៅដោះគោ Neysure Gold នេះ មានពាក់ព័ន្ធនឹងក្រុមហ៊ុនវៀតណាមឈ្មោះ DigiPhar ដែលគេស្គាល់ឈ្មោះពេញថា DigiPhar Pharmaceutical Joint Stock Company (DigiPar Pharmaceutical., JSC)។
ព័ត៌មានសង្ខេបរបស់ក្រុមហ៊ុននេះ បង្ហាញថា ក្រុមហ៊ុនវៀតណាមមួយនេះ ធ្វើប្រតិបត្តិការក្នុងនាមជាក្រុមហ៊ុនផ្សព្វផ្សាយលក់ផលិតផលថែទាំសុខភាពនៅលើបណ្ដាញអនឡាញនៅតំបន់អាស៊ីអាគ្នេយ៍។ ប៉ុន្តែ គ្មានព័ត៌មានលម្អិតបន្ថែម ឬកំណត់ត្រាផ្សេងទៀតអំពីក្រុមហ៊ុននេះនោះឡើយ។
សន្និដ្ឋាន
Fact Crescendo រកឃើញថា វីដេអូផ្សាយពាណិជ្ជកម្មផលិតផល Neysure Gold មិនត្រឹមត្រូវនោះឡើយ។ ផលិតផលម្សៅដោះគោដែលធ្វើទីផ្សាយដោយក្រុមហ៊ុនវៀតណាមនោះ ត្រូវបានផ្សព្វផ្សាយលក់ដោយខុសច្បាប់នៅលើបណ្ដាញសង្គមនៅតាមប្រទេសក្នុងតំបន់ ដូចជា កម្ពុជា ថៃ ហ្វីលីពីន និងភូមា។
Title: ម្សៅដោះគោ Neysure Gold ត្រូវបានផ្សព្វផ្សាយលក់ដោយខុសច្បាប់លើបណ្ដាញសង្គម
Fact Check By: Jay UdomResult: False
