Fact Check: តើកោះទាំងពីរនេះតជាប់គ្នាដោយថ្មមានទម្រង់ជាការចាប់ដៃមែនដែរឬទេ?
ការរីករាលដាលនូវជំងឺឆ្លងកូវីដ១៩បានធ្វើឲ្យមានផលប៉ះពាល់យ៉ាងខ្លាំង ជាពិសេសទៅលើវិស័យទេសចរណ៍ ដែលប្រទេសមួយចំនួន កំពុងតែបន្តការហាមឃាត់ការធ្វើដំណើរពលរដ្ឋរបស់ខ្លួនផ្លាស់ទី ឬទៅកាន់រមណីយដ្ឋានទេសចរណ៍នានា។ ទន្ទឹមគ្នានេះ ទិដ្ឋភាពកោះចំនួនពីរតភ្ជាប់គ្នាដោយថ្មដែលមានទម្រង់ជាការចាប់ដៃនោះ ត្រូវបានចែករំលែកនៅលើបណ្ដាញសង្គមយ៉ាងផុសផុល។
ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា រូបថតដែលអ្នកប្រើប្រាស់បង្ហោះ និងចែកចាយនៅលើបណ្តាញសង្គមនោះ មិនមែនជាការពិតនោះឡើយ។
ការអះអាងលើបណ្តាញសង្គម
កាលពីថ្ងៃទី០៧ ខែកក្កដា ឆ្នាំ២០២១ថ្មីៗកន្លងទៅនេះ អ្នកប្រើហ្វេសប៊ុកម្នាក់ បានបង្ហោះរូបថតមួយសន្លឹកក្នុងក្រុមមួយទឹកដីកម្ពុជាក្រោម ដែលបង្ហាញរូបកោះចំនួនពីរដែលមានរូបរាងដូចគ្នាទាំងស្រុង។ រូបថតមួយសន្លឹកនេះ ក៏បង្ហាញការភ្ជាប់រវាងកោះទាំងពីរដោយថ្មដែលមានទម្រង់ដូចជាមនុស្សកំពុងតែចាប់ដៃគ្នា។ អ្នកប្រើប្រាស់ដដែលខាងលើនេះ ពុំបានបញ្ជាក់អំពីទីតាំង និងព័ត៌មានលម្អិតជាក់លាក់នោះទេ។
រូបថតនេះ ត្រូវបានចែករំលែកតៗគ្នាជាច្រើនដង រួមជាមួយនឹងប្រតិកម្ម និងការបញ្ចេញមតិចម្រុះពីសំណាក់អ្នកប្រើហ្វេសប៊ុកនិយាយភាសាខ្មែរផងដែរ។
រូបភាពផ្ដាមចេញពីប៉ុស្តិ៍របស់អ្នកប្រើហ្វេសប៊ុក បង្ហាញអំពីទិដ្ឋភាពកោះចំនួនពីរតភ្ជាប់គ្នាដោយថ្មដែលមានរូបរាងដូចជាការចាប់ដៃ។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាល់លើរូបភាពនេះតាមរយៈការដំណើរការកម្មវិធីស្វែងរករូបថតរបស់ក្រុមហ៊ុន Google ដែលនាំឱ្យយើងជួបប្រទះនូវប្រភព និងខ្លឹមសាររូបថតនៃច្បាប់ដើមមួយចំនួន។
រូបថតដែលមានទម្រង់ និងទិដ្ឋភាពនៃកោះដូចគ្នានេះ ត្រូវបានរកឃើញនៅលើគេហទំព័រ Getty Images ដែលជាគេហទំព័រសោតទស្សន៍ដ៏ធំមួយ។ គេហទំព័រ Getty Images នេះ ក៏បានបញ្ជាក់អំពីឈ្មោះ និងទីតាំងរបស់កោះមួយនេះផងដែរ ដែលមានឈ្មោះថា James Bond ស្ថិតនៅក្នុងខេត្ត Phang Nga ប្រទេសថៃ។
រូបភាពផ្តាមចេញពីគេហទំព័រ បង្ហាញអំពីទិដ្ឋភាពនៃកោះមួយនេះ ពុំបានបង្ហាញនូវរូបរាង និងភិនភាគដូចដែលអ្នកប្រើប្រាស់យកមកបង្ហោះនៅក្នុងបណ្តាញសង្គមនោះឡើយ។
តើកោះ James Bond ស្ថិតនៅទីណា?
កោះ James Bond ឬកោះតាពូ (James Bond Island or Tapu Island) ស្ថិតនៅក្នុងខេត្ត Phang Nga ប្រទេសថៃ ដែលមានចម្ងាយប្រមាណជាង៤០គីឡូម៉ែត្រពីកោះភូកេត។ កោះមួយនេះ ត្រូវបានគេស្គាល់តាមរយៈរឿងមួយមានចំណងជើងថា The Man with the Golden Gun ដែលផ្សព្វផ្សាយតាំងពីឆ្នាំ១៩៧៤មកម្ល៉េះ។
រូបភាពផ្តាមចេញពីគេហទំព័រ Google Map បានបង្ហាញអំពីទិដ្ឋភាពរួមនៃកោះ James Bond ដែលពុំបានបង្ហាញពីទិដ្ឋភាពកោះចំនួនពីរតភ្ជាប់គ្នាដោយថ្មមានរូបរាង និងទម្រង់ជាការចាប់ដៃនោះទេ។
សន្និដ្ឋាន
Fact Crescendo Cambodia បានរកឃើញថា រូបថតដូចដែលបានរៀបរាប់ខាងលើ ត្រូវបានកាត់ត មុននឹងបង្ហោះ និងចែករំលែកនៅលើបណ្ដាញសង្គមហ្វេសប៊ុក។ ការពិតរូបថតមួយសន្លឹកនេះ ត្រូវបានគេស្គាល់ថាគឺជាកោះ James Bond
Title:តើកោះទាំងពីរនេះតជាប់គ្នាដោយថ្មមានទម្រង់ជាការចាប់ដៃមែនដែរឬទេ?
Fact Check By: Kakada SimResult: False
