បញ្ហានៃការកាប់បំផ្លាញព្រៃឈើ និងដឹកជញ្ជូននាំចេញទៅកាន់ទីផ្សារឈើខុសច្បាប់ទាំងក្នុងស្រុក និងក្រៅស្រុកក្តី បានក្លាយជាប្រធានបទនៃការជជែកដេញដោល និងបញ្ចេញមតិជារឿយៗនៅលើបណ្ដាញសង្គមពីសំណាក់ ប្រជាពលរដ្ឋកម្ពុជា។ ថ្មីៗនេះ រូបថតមួយសន្លឹកត្រូវបានចែកចាយ និងបង្ហោះនៅលើបណ្ដាញសង្គមហ្វេសបុ៊ក ដែលនាំឱ្យមានការសន្និដ្ឋានថា រូបថតនេះបង្ហាញអំពីតថភាព និងទិដ្ឋភាពនៃការកាប់ឈើដោយខុសច្បាប់ នៅក្នុងប្រទេសកម្ពុជា។ ទោះយ៉ាងណាការផ្ទៀងផ្ទាត់របស់ Fact Crescendo Cambodia បានបង្ហាញថាការអះអាងនេះ គឺមិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី៣០ ខែឧសភា ឆ្នាំ២០២១កន្លងទៅនេះ អ្នកប្រើហ្វេសប៊ុកម្នាក់ បង្ហោះរូបថតពីរសន្លឹក ដែលមានមួយសន្លឹកបានបង្ហាញអំពីទិដ្ឋភាពរថយន្ត១គ្រឿងដឹកឈើលើសទម្ងន់បណ្តាលឲ្យបាក់ស្ពានមួយកន្លែង។ អ្នកប្រើហ្វេសប៊ុករូបនេះ មិនបានបញ្ជាក់ច្បាស់ទេថាទិដ្ឋភាពនៃការបាក់ស្ពានមួយនេះស្ថិតនៅតំបន់ណាមួយនោះទេ ប៉ុន្តែ សារបង្ហោះនេះហាក់ដូចជាសំដៅទៅដល់ការកាប់បំផ្លាញព្រៃឈើនៅក្នុងប្រទេសកម្ពុជាយើង។
រូបថតជាមួយសំណេរនេះត្រូវបានចែករំលែកបន្តៗគ្នាជាច្រើនដង រួមជាមួយនឹងការចុចគាំទ្រពីសំណាក់អ្នកប្រើ ហ្វេសប៊ុកនិយាយភាសាខ្មែរផងដែរ។
រូបភាពផ្ដាមចេញពីប៉ុស្តិ៍របស់អ្នកប្រើប្រាស់ដែលបានរៀបរាប់ជាភាសាខ្មែរថា «កាប់អុសដើម្បីក្រពះ គេថាបំផ្លាញព្រៃ រីឯ ដឹកឈើបំផ្លាញផ្លូវស្ពាន ដើម្បីមន្រ្តីអ្នកមានស្តុកស្តម្ភ គេថាសេដ្ឋកិច្ចរីកចម្រើន! #ស្រុករំដួល»។
ការត្រួតពិនិត្យការពិត
Fact Crescendo Cambodia បានចាប់ផ្តើមត្រួតពិនិត្យ និងផ្ទៀងផ្ទាត់រូបថតតាមរយៈកម្មវិធី Google Reverse Image ដែលនាំឲ្យទៅរកឃើញប្រភពដើមនៃទិដ្ឋភាពការបាក់ស្ពានដោយសារការដឹកឈើលើសចំណុះនេះដែលមានទម្រង់ដូចគ្នាទាំងស្រុង។
រូបថតមានទម្រង់ និងទិដ្ឋភាពដូចគ្នាមួយសន្លឹកនេះ ត្រូវបានរកឃើញដើមនៅក្នុងអ្នកប្រើហ្វេសប៊ុកជនជាតិឡាវម្នាក់ ដែលមានឈ្មោះ Mouanekham Phanthavong។ រូបថតនេះត្រូវបានបង្ហោះតាំងពីថ្ងៃ១០ ខែធ្នូ ឆ្នាំ២០១៣មកម្ល៉េះ ជាង ៨ឆ្នាំមុនដែលអ្នកប្រើហ្វេសប៊ុកកម្ពុជាម្នាក់យកមកបង្ហោះជាថ្មី។
រូបភាពផ្ដាមចេញពីប៉ុស្តិ៍របស់អ្នកប្រើប្រាស់ដែលបានសរសេររៀបរាប់ជាភាសាអង់គ្លេសថា «Truck overload. Over bridge limited an accident happened at beualapha district» ឬប្រែជាភាសាខ្មែរមានន័យថា «ឡានធំលើសចំណុះ ធ្វើឲ្យមានហេតុការណ៍កើតឡើងនៅក្នុងស្រុក Boualapha »។
រូបថតដូចគ្នាទាំងស្រុងមួយនេះ ក៏ត្រូវបានបង្ហោះលើទំព័រហ្វេសប៊ុក ໂທລະໂຄ່ງ THOLAKHONG កាលពីថ្ងៃទី១១ ខែធ្នូ ឆ្នាំ២០១៣។ ទំព័រហ្វេសប៊ុកខាងលើនេះ ក៏បានបញ្ជាក់នៅក្នុងសារបង្ហោះរបស់ខ្លួនផងដែរទាក់ទងទៅនឹងប្រភព និងទីតាំងនៃហេតុការណ៍នៃរូបថតមួយនេះ។
រូបភាពផ្ដាមចេញពីទំព័រហ្វេសប៊ុកខាងលើ បានសរសេររៀបរាប់ជាភាសាឡាវថា «ລົດຂົນໄມ້ ບັນທຸກເກີນນ້ຳໜັກ ຈົນຂົວຫັກ, ທີ່ເມືອງບົວລະພາ, ແຂວງຄຳມ່ວນ. ເປັນລົດຫວຽດນາມ ທີ່ມາຂົນໄມ້ຢູ່ລາວ. ດຽວໂທລະໂຄ່ງ ຊອກລາຍລະອຽດເພີ່ມ» ឬប្រែសម្រួលជាភាសាខ្មែរមានន័យថា «ការធ្វើឲ្យបាក់ស្ពាន ដោយសារតែការដឹកឈើ លើសចំណុះ នៅក្នុងស្រុក Boualapha នៃខេត្ត Khammouane ប្រទេសឡាវ»។
Fact Crescendo Cambodia ក៏បានធ្វើការទំនាក់ទំនងទៅកាន់អ្នកប្រើហ្វេសប៊ុកជនជាតិឡាវម្នាក់នេះផងដែរតាមរយៈប្រព័ន្ធសារ Messenger ដែលលោកទើបតែបានធ្វើការឆ្លើយតប និងបំភ្លឺមកកាន់ក្រុមការងាររបស់យើងវិញកាលពីព្រឹកថ្ងៃទិី០៧ ខែមិថុនា ឆ្នាំ២០២១នេះ ដោយបានបញ្ជាក់ថា លោកពិតជាអ្នកថតរូបថតមួយនេះពិតប្រាកដមែន។ លោកក៏បានបញ្ជាក់ទៀតថា រូបថតនេះត្រូវបានថតឡើងនៅក្នុងឆ្នាំ២០១៣ ដែលវាបានកើតឡើងនៅក្នុងស្រុក Boualapha នៃខេត្ត Khammouane ប្រទេសឡាវ។
ឆ្លើយតបនឹងការសាកសួរបន្ថែមពី Fact Crescendo Cambodia តាមរយៈប្រព័ន្ធផ្ញើសារនៅថ្ងៃនេះ អ្នកប្រើហ្វេសប៊ុក ដែលបានអះអាងខាងលើនោះ បានប្រាប់ឲ្យបានដឹងថា រូបថតទាំងពីរនេះត្រូវបានយកមកផ្សព្វផ្សាយបន្តពីក្នុងបណ្តាញ សង្គមហ្វេសប៊ុក និងមិនសូវជាច្បាស់អំពីប្រភពដើមនៃរូបថតបាក់ស្ពាននោះទេ។ អ្នកប្រើហ្វេសប៊ុកដដែលនេះ ក៏បានបញ្ជាក់ផងដែរថា លោកគ្រាន់តែចង់ឲ្យមានការគិតគូរឡើងវិញជុំវិញទៅនឹងបញ្ហាមួយនេះ។
សន្និដ្ឋាន (Conclusion)
Fact Crescendo Cambodia បានរកឃើញថាការអះអាងដូចរៀបរាប់ខាងលើនេះ គឺមិនត្រឹមត្រូវនោះឡើយ។ រូបថតមួយសន្លឹកក្នុងចំណោមពីរនេះ មិនមែនជាការបាក់ស្ពានដោយសារតែការដឹកឈើនៅក្នុងប្រទេសកម្ពុជានោះទេ។ រូបថតមួយនេះ ត្រូវបានរកឃើញដំបូងឡើងតាំងពីឆ្នាំ២០១៣មកម្ល៉េះ ដែលបានកើតឡើងនៅក្នុងស្រុក Boualapha នៃខេត្ត Khammouane ប្រទេសឡាវ។
Title:រថយន្តដឹកឈើពេញបណ្តាលឲ្យបាក់ស្ពាននេះមិនមែនកើតឡើងនៅកម្ពុជានោះទេ
Fact Check By: Kakada SimResult: False
