- >>
- FALSE
រូបថតត្រីននៀលក្នុងផ្សារទំនើបត្រូវបានគេភ្ជាប់មិនត្រឹមត្រូវនឹងរឿងរ៉ាវទឹកជំនន់នៅឌូបៃ
បន្ទាប់ពីទីក្រុងឌូបៃរបស់ប្រទេសអារ៉ាប់រួមលិចលង់ដោយជំនន់ទឹកភ្លៀងនាពេលថ្មីៗនេះ ការអះអាងមួយនៅលើបណ្ដាញសង្គម បានផ្សព្វផ្សាយថា មានត្រីឆ្លាមជាច្រើនជាប់នៅក្នុងផ្សារទំនើបមួយនៃទីក្រុងឌូបៃ ក្រោយទឹកជំនន់ស្រកទៅវិញ។ ការអះអាងនេះ ត្រូវបានចែករំលែកបន្តយ៉ាងច្រើន ហើយក៏មានការបញ្ចេញមតិចម្រុះផងដែរ។ ទោះជាយ៉ាងណា បន្ទាប់ពីផ្ទៀងផ្ទាត់ទៅលើរូបភាពនេះ យើងរកឃើញថា ព័ត៌មាននេះមិនត្រឹមត្រូវនោះឡើយ។
ការអះអាងលើបណ្ដាញសង្គម
ព័ត៌មានមួយដែលកំពុងផុសផុលនៅលើបណ្ដាញសង្គម បាននិយាយថា ត្រីឆ្លាមជាច្រើនក្បាល ត្រូវបានគេប្រទះឃើញនៅក្នុងផ្សារទំនើបមួយកន្លែងនៃទីក្រុងឌូបៃ (Dubai) ប្រទេសអារ៉ាប់រួម (UAE) បន្ទាប់ពីជំនន់ទឹកភ្លៀងដែលវាយប្រហារទីក្រុងនេះ បានស្រកចុះទៅវិញ។
ព័ត៌មាននេះ ត្រូវបានបង្ហោះនៅលើបណ្ដាញសង្គមជាមួយរូបថតដែលបង្ហាញមនុស្សមួយក្រុមឈរមើលត្រីស្ថិតនៅរាយប៉ាយនៅលើផ្ទៃរាបស្មើនៅក្នុងទីតាំងមួយដែលមានធ្នើរផ្ទុកទំនិញចម្រុះ។
បន្ទាប់ពីវាត្រូវបានបង្ហោះនៅលើបណ្ដាញសង្គមរួចមក ព័ត៌មាននេះ ត្រូវបានចែករំលែកបន្តជាច្រើនដងអ្នកប្រើប្រាស់បណ្ដាញសង្គម ហើយក៏មានអ្នកប្រើប្រាស់ហ្វេសប៊ុកនិយាយភាសាខ្មែរជាច្រើន បានបញ្ចេញមតិយោបល់ចម្រុះបែប ក្នុងនោះមានអ្នកប្រើប្រាស់ហ្វេសប៊ុកមួយចំនួនជឿថា ព័ត៌មាននេះគឺជាការពិត។
ខាងក្រោមនេះ គឺជារូបភាពផ្ដាមចេញពីព័ត៌មានដែលត្រូវបានបង្ហោះនៅលើបណ្ដាញសង្គមកាលពីថ្ងៃទី២១ ខែមេសា ឆ្នាំ២០២៤ ដែលសរសេររៀបរាប់ថា “ទីក្រុងឌូបៃៈ ក្រោយជំនន់ ទឹកស្រក តាមម៉ាតទំនិញនៃទីក្រុងឌូបៃសុទ្ធតែត្រីឆ្លាម”។
ព័ត៌មានដូចគ្នានេះ ក៏ត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកមួយទៀតដែរ។ សូមមើលព័ត៌មាននេះតាមរយៈតំណភ្ជាប់នៅទីនេះ (archived) ឬតំណភ្ជាប់មួយទៀតនៅទីនេះ (archived)។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
តាមរយៈ Google Reverse Image Search យើងបានរកឃើញវីដេអូនៅលើបណ្ដាញ YouTube ដែលបង្ហាញត្រីរស់ជាច្រើនក្បាលននៀលនៅលើកម្រាលឥដ្ឋការ៉ូនៅក្នុងផ្សារទំនើបមួយកន្លែង បន្ទាប់ពីអាងចិញ្ចឹមត្រីមួយបានបែកធ្លាយ។
វីដេអូនេះ ត្រូវបានគេបង្ហោះនៅលើបណ្ដាញ YouTube តាំងពី ៦ឆ្នាំមុនម៉្លេះ ជាមួយសំណេរបញ្ជាក់ថា ហេតុការណ៍នេះកើតឡើងនៅក្នុងផ្សារទំនើប Carrefour ស្ថិតនៅក្នុងទីក្រុង Tbilisi នៃប្រទេសហ្សកហ្ស៊ី (Georgia) ស្ថិតនៅភាគខាងត្បូងនៃប្រទេសរុស្ស៊ី។
ខាងក្រោមនេះ គឺជាវីដេអូទាំងស្រុងដែលត្រូវបានបង្ហោះនៅលើបណ្ដាញ YouTube ដោយឆាណែលមួយកាលពីថ្ងៃទី០៣ ខែកុម្ភៈ ឆ្នាំ២០១៨កន្លងមក។
ដោយសារតែវីដេអូនេះល្បីផុសផុលខ្លាំងនាពេលនោះ វាត្រូវបានចុះផ្សាយដោយសារព័ត៌មានអង់គ្លេសផងដែរនាឆ្នាំនោះ ដែលបញ្ជាក់ថា រឿងរ៉ាវនេះកើតឡើងនៅឯប្រទេសហ្សកហ្ស៊ី នាដើមឆ្នាំ២០១៨។ សូមមើលអត្ថបទព័ត៌មាននៅទីនេះ (archived) ឬមួយទៀតនៅទីនេះ (archived)។
វីដេអូមួយនេះ ក៏ត្រូវបានអ្នកប្រើប្រាស់បណ្ដាញសង្គមមួយចំនួនយកទៅបង្ហោះបន្តនៅលើបណ្ដាញសង្គមដោយរៀបរាប់ដោយមិនត្រឹមត្រូវភ្ជាប់ទៅនឹងហេតុការណ៍ទឹកជំនន់នៅប្រទេសផ្សេងទៀត ប៉ុន្តែ ត្រូវបានក្រុមការងារត្រួតពិនិត្យព័ត៌មានក្លែងក្លាយ Fact Crescendo បានផ្ទៀងផ្ទាត់រួចរាល់ដែរ។ សូមមើលអត្ថបទទាំងស្រុងនៅទីនេះ។
សន្និដ្ឋាន
Fact Crescendo Cambodia បានរកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ រូបថតត្រីននៀលនៅលើកម្រាលឥដ្ឋការ៉ូក្នុងផ្សារទំនើបនេះ មិនមែនកើតឡើងនៅទីក្រុងឌូបៃ ប្រទេសអារ៉ាប់រួមនោះឡើយ។ រូបភាពនេះ ត្រូវបានផ្ដាមចេញពីវីដេអូចាស់កាលពី ៦ឆ្នាំមុន ដែលជាហេតុការណ៍បែកធ្លាយទូរចិញ្ចឹមត្រីនៅក្នុងផ្សារទំនើបមួយកន្លែងនៅប្រទេសហ្សកហ្ស៊ី។
Title: រូបភាពត្រីននៀលក្នុងផ្សារទំនើបមួយត្រូវបានគេភ្ជាប់មិនត្រឹមត្រូវនឹងរឿងរ៉ាវទឹកជំនន់នៅឌូបៃ
Fact Check By: Jay UdomResult: False
