ចាប់តាំងពីផ្ទុះការឆ្លងរីករាលដាលនៃមេរោគកូវីដ-១៩មក វៀតណាមបានបោះតង់ និងដាក់ពង្រាយកងទ័ពរបស់ខ្លួនចូលមកតំបន់ព្រំដែនជាប់ជាមួយកម្ពុជា ដែលនាំឱ្យមានការចោទសួរថា តើវៀតណាមធ្វើបែបនេះក្នុងបំណង់អ្វី។
ទន្ទឹមគ្នានេះ រូបថតពីរសន្លឹក ត្រូវបានបង្ហោះនៅលើបណ្ដាញសង្គមជាមួយការអះអាងថា រូបថតទាំងពីរសន្លឹកនេះ បង្ហាញនូវការបោះតង់របស់ជនជាតិវៀតណាមនៅតាមខ្សែបន្ទាត់ព្រំដែនកម្ពុជា។ រូបថតជាមួយនឹងការអះអាងបែបនេះ ត្រូវបានចែករំលែកតៗគ្នាដល់ទៅរាប់ពាន់នៅក្នុងរយៈពេលត្រឹមតែ ២៤ម៉ោងប៉ុណ្ណោះ។
ទោះជាយ៉ាងណា ការត្រួតពិនិត្យការពិត បានរកឃើញថា រូបថតជាមួយការអះអាងបែបនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
នៅថ្ងៃទី០៦ ខែកក្កដា ឆ្នាំ២០២១ រូបថតពីរសន្លឹក ត្រូវបានបង្ហោះនៅលើបណ្ដាញសង្គមជាមួយការអះអាងថា រូបថតទាំងពីរនេះ គឺទិដ្ឋភាពជនជាតិវៀតណាម ដែលត្រូវបានបញ្ជូនឱ្យទៅបោះតង់នៅតាមបន្ទាត់ព្រំដែនកម្ពុជា។
រូបថតជាមួយការអះអាងបែបនេះ ត្រូវបានចែករំលែកដោយអ្នកប្រើប្រាស់ហ្វេសប៊ុកនិយាយភាសាខ្មែរដល់ទៅជិត ១,០០០ដង រួមជាមួយការបញ្ចេញមតិ និងប្រតិកម្មយ៉ាងច្រើនផងដែរ។ រូបថតជាមួយការអះអាងបែបនេះ ក៏ត្រូវបានចែករំលែកទៅកាន់គ្រុបហ្វេសប៊ុកដទៃទៀត ដែលមានគណនីហ្វេសប៊ុករាប់សិបពាន់ជាសមាជិក។
ខាងក្រោមនេះ គឺជារូបភាពផ្ដាមចេញប៉ុស្តិ៍របស់អ្នកប្រើប្រាស់ហ្វេសប៊ុកដែលបានរៀបរាប់ថា «គ្រោះមហន្តរាយជាតិបានមកដល់ហើយ ខ្មែរអើយៗក្រោកឡើងៗ ពេលនេះមេដឹកនាំយួនបានបញ្ជូនពលរដ្ឋរបស់ខ្លួនឱ្យចេញមកបោះតង់តាមខ្សែបន្ទាត់ព្រំដែនខេត្តស្វាយរៀង។ តាមការអះអាងរបស់អាជ្ញាធរយួន បានបញ្ជាក់ថា ធ្វើនេះគឺដើម្បីការពារ Covid-19។ បើតាមការអះអាងរបស់ពលរដ្ឋខ្មែរយើងថា យួនបានបោះតង់ចូលមកក្នុងទឹកដីខ្មែរហួសបន្ទាត់ព្រំដែនរាប់រយគីឡូម៉ែត្រ តែគ្មានអាជ្ញាធរខ្មែរណាហ៊ានក្អកឡើយ»។
ការពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យលើរូបថតទាំងពីរសន្លឹកតាមរយៈការដំណើរការកម្មវិធីស្វែងរករូបថតរបស់ Google ដែលនាំឱ្យយើងបានជួបរូបថត និងព័ត៌មានអំពីរូបថតទាំងពីរសន្លឹកនេះ។
រូបថតទាំងពីរសន្លឹកនេះ ត្រូវបានរកឃើញនៅក្នុងបណ្ណាសារនៃអង្គការកាកបាទក្រហមអន្តរជាតិ (ICRC) ដែលផ្ដល់ព័ត៌មានលម្អិតថា រូបថតទាំងពីរនេះ បង្ហាញជនភៀសខ្លួនជាពលរដ្ឋកម្ពុជា បោះតង់នៅឯជំរុំជនភៀសខ្លួនណងចាន់ ស្ថិតនៅក្នុងទឹកដីថៃ ដើម្បីគេចចេញពីការវាយប្រហារបស់វៀតណាមនៅក្នុងឆ្នាំ១៩៨០។
ICRC’s Archives | Archived Link
រូបថតទាំងពីរសន្លឹកនេះ គឺជាផ្នែកមួយនៃរូបថតជាច្រើនទៀតបង្ហាញទិដ្ឋភាពនៃស្ថានភាពជនភៀសខ្លួនកម្ពុជានៅតាមជំរុំជនភៀសខ្លួនស្ថិតនៅតាមបន្ទាត់ព្រំដែន បន្ទាប់ពីវៀតណាមលើកទ័ពចូលឈ្លានពានកម្ពុជា និងបានផ្ដួលរំលំរដ្ឋាភិបាលកម្ពុជាប្រជាធិបតេយ្យ ឬខ្មែរក្រហមនៅដើមឆ្នាំ១៩៧៩។
រូបថតទាំងពីរសន្លឹកនេះ គឺស្ថិតក្នុងចំណោមរូបថតជាច្រើនទៀត ដែលត្រូវបានថតដោយអ្នកថតរូបលោក JEAN-JACQUES KURZ ហើយដែលត្រូវបានរក្សាទុកនៅក្នុងបណ្ណាសាររបស់កាកបាទក្រហមអន្តរជាតិ។
ICRC’s Archives | Archived Link
សន្និដ្ឋាន
Fact Crescendo Cambodia បានរកឃើញថា ការអះអាងទៅលើរូបថតទាំងពីរសន្លឹកដូចបានរៀបរាប់ខាងលើនេះ មិនត្រឹមត្រូវនោះឡើយ។ រូបថតទាំងពីរសន្លឹកនេះ មិនមែនជាទិដ្ឋភាពនៃជនជាតិវៀតណាមបោះតង់នៅតាមបណ្ដោយព្រំដែនជាមួយកម្ពុជានោះឡើយ។ រូបថតទាំងពីរសន្លឹកនេះ គឺជាទិដ្ឋភាពនៃជនភៀសខ្លួនកម្ពុជានៅឯជំរុំណងចាន់ ស្ថិតនៅក្នុងប្រទេសថៃ ដែលថតដោយអ្នកថតរូប លោក JEAN-JACQUES KURZ កាលពីឆ្នាំ១៩៨០។
Title:តើរូបថតទាំងនេះគឺជាការបោះតង់ដោយជនជាតិវៀតណាមតាមព្រំដែនកម្ពុជាមែនឬទេ?
Fact Check By: Jay UdomResult: False
