ខណៈដែលបញ្ហាគុណភាពផ្លូវថ្នល់នៅកម្ពុជា តែងតែរងការរិះគន់ជារឿយៗនោះ រូបថតមួយសន្លឹកដែលបង្ហាញទិដ្ឋភាពផ្លូវក្រាលកៅស៊ូដាច់បាក់មួយកន្លែង ត្រូវបានបង្ហោះ និងចែកចាយដោយអ្នកប្រើប្រាស់ម្នាក់។ រូបថតនេះ បានធ្វើឲ្យអ្នកប្រើប្រាស់ហ្វេសប៊ុកមួយចំនួន គិតថា ទិដ្ឋភាពនេះ បានកើតឡើងនៅក្នុងប្រទេសកម្ពុជា។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា រូបថតបង្ហោះនៅលើបណ្តាញសង្គមហ្វេសប៊ុកនោះ គឺធ្វើឲ្យមានការយល់ច្រឡំ។
ការអះអាងលើបណ្តាញសង្គម
កាលពីថ្ងៃទី២៥ ខែមិថុនា ឆ្នាំ២០២២កន្លងទៅថ្មីៗនេះ អ្នកប្រើប្រាស់ហ្វេសប៊ុកម្នាក់ បានចែករំលែកនូវរូបថតមួយសន្លឹក ទៅក្នុងក្រុមហ្វេសប៊ុកមួយឈ្មោះថា «ព័ត៌មានថ្មីៗ ទាន់ហេតុការណ៍ 24h» ដោយបានបង្ហាញទិដ្ឋភាពការខូចខាតដាច់បាក់ផ្លូវមួយកន្លែង។ អ្នកប្រើប្រាស់ដដែលខាងលើ ពុំបានបញ្ជាក់អំពីព័ត៌មានលំអិត និងទីតាំងច្បាស់លាស់នៃទិដ្ឋភាពផ្លូវមួយនេះឡើយ។
រូបថតនេះ ត្រូវបានចែករំលែកជាច្រើនដងពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ រួមជាមួយការបញ្ចេញមតិចម្រុះ និងប្រតិកម្មជាច្រើនផងដែរ។
ខាងក្រោមនេះ គឺជារូបភាពផ្តាមចេញពីប៉ុស្ដិ៍របស់អ្នកប្រើប្រាស់ សរសេររៀបរាប់ថា «ខ្យល់ខ្លាំងពេកប៉ើងផ្លូវអស់»។
រូបភាពផ្ដាមខាងក្រោមនេះ បានបង្ហាញនូវការបញ្ចេញមតិចម្រុះពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរទៅនឹងការបង្ហោះរូបថតខាងលើ។
ការត្រួតពិនិត្យការពិត
Fact Crescendo Cambodia ចាប់ផ្ដើមត្រួតពិនិត្យទៅលើរូបថតខាងលើនេះ តាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតដែលមានទម្រង់ និងសណ្ឋានផ្លូវដែលខូចខាតមួយនេះ ត្រូវបានរកឃើញនៅលើបណ្ដាញសង្គមហ្វេសប៊ុក បង្ហោះកាលពីថ្ងៃទី៣១ ខែសីហា ឆ្នាំ២០១៩កន្លងទៅ។ អ្នកប្រើប្រាស់ដដែលនេះ បានសរសេរ និងបញ្ជាក់ជាភាសាថៃ ដែលមានអត្ថន័យជាភាសាខ្មែរថា «ការខូចខាតនេះ បានធ្វើឲ្យខ្ញុំដឹងថា នៅក្នុងសង្កាត់ខ្ញុំមានផ្លូវស្ដង់ដាបែបណា»។
ខាងក្រោម គឺជារូបភាពផ្ដាមចេញពីគណនីហ្វេសប៊ុកខាងលើ បង្ហាញនូវទិដ្ឋភាពការខូចខាតផ្លូវនៅក្នុងប្រទេសថៃកាលពីឆ្នាំ២០១៩។
រូបភាពផ្ដាមនេះ បង្ហាញទិដ្ឋភាពជ្រុងមួយទៀតនៃការខូតខាតផ្លូវក្រាលកៅស៊ូមួយកំណាត់នេះផងដែរ។
តាមរយៈគេហទំព័រសារព័ត៌មាន Thai PBS ផ្សព្វផ្សាយកាលពីថ្ងៃទី០១ ខែកញ្ញា ឆ្នាំ២០១៩កន្លងទៅ ក៏បានបញ្ជាក់អំពីទីតាំងនៃហេតុការណ៍មួយនេះផងដែរ គឺបានកើតឡើងនៅក្នុងខេត្តអំណាតចារើន (Amnat Charoen) ប្រទេសថៃ។
ខាងក្រោមនេះ គឺជារូបភាពផ្តាមចេញពីគេហទំព័រសារព័ត៌មានខាងលើ ដែលមានចំណងជើងជាភាសាថៃ និងប្រែសម្រួលជាភាសាខ្មែរមានន័យថា អ្នកប្រើប្រាស់បណ្ដាញសង្គមព្រួយបារម្ភរឿងផ្លូវក្រាលកៅស៊ូបាក់ក្រោយទឹកជំនន់។
ក្រុមការងាររបស់ Fact Crescendo Cambodia ក៏បានរកឃើញផងដែរថា ស្លាកលេខនៅក្នុងរូបថតបង្ហោះខាងលើនោះ គឺជាស្លាកលេខសម្រាប់សម្គាល់ទោចក្រយានយន្តនៅក្នុងប្រទេសថៃ។ ខាងក្រោមនេះ គឺជារូបភាពផ្ដាមចេញពីគេហទំព័រខាងលើ ដែលបានបង្ហាញនូវទម្រង់ដូចគ្នានៃស្លាកសម្គាល់យានយន្តប្រើប្រាស់នៅក្នុងប្រទេសថៃ។
World License Plates | Archived Link
ដូចគ្នានេះ ករណីខាងលើ ក៏ត្រូវបានផ្ទៀងផ្ទាត់ដោយទីភ្នាក់ងារព័ត៌មាន AFP ផងដែរ កាលពីថ្ងៃទី១១ ខែកញ្ញា ឆ្នាំ២០២២កន្លងទៅ។ គេហទំព័រដដែលនេះ បានបញ្ជាក់នៅក្នុងអត្ថបទរបស់ខ្លួនថា ហេតុការណ៍ខាងលើ បានកើតឡើងនៅក្នុងប្រទេសថៃ កាលពីអំឡុងឆ្នាំ២០១៩កន្លងទៅនេះ។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News
សន្និដ្ឋាន
Fact Crescendo Cambodia រកឃើញថា រូបថតភ្ជាប់នឹងការអះអាងដូចដែលរៀបរាប់ខាងលើ គឺធ្វើឲ្យមានការយល់ច្រឡំ។ ផ្លូវកៅស៊ូរងការខូចខាតនេះ មិនមែនកើតឡើងនៅក្នុងប្រទេសកម្ពុជានោះទេ។ ករណីនេះ បានកើតឡើងនៅក្នុងខេត្តអំណាតចារើន (Amnat Charoen) ប្រទេសថៃ កាលពីឆ្នាំ២០១៩កន្លងទៅ។
Title:តើស្ថានភាពផ្លូវខូចខាតមួយនេះ កើតឡើងនៅក្នុងកម្ពុជាមែនឬទេ?
Fact Check By: Kakada SimResult: Missing Context
