គិតត្រឹមថ្ងៃទី២៦ ខែកក្កដា ឆ្នាំ២០២១នេះ កម្ពុជាមានអត្រាអ្នកចាក់វ៉ាក់សាំងកូវីដ-១៩សរុបមានចំនួន ៦៨,៣៩% ដែលធៀបជាមួយនឹងប្រជាជនគោលដៅ១០លាននាក់ ដោយបានប្រើប្រាស់វ៉ាក់សាំងដូចជា COVISHIELD (AstraZeneca), ស៊ីណូហ្វាម និងស៊ីណូវ៉ាក់។ យុទ្ធនាការនៃការចាក់វ៉ាក់សាំងនេះ បានធ្វើឲ្យមានការជជែកដេញដោលយ៉ាងខ្លាំងពីសំណាក់អ្នកប្រើប្រាស់បណ្តាញសង្គមយ៉ាងផុសផុល អំពីប្រសិទ្ធភាព និងផលប៉ះពាល់នៃប្រភេទវ៉ាក់សាំងដែលខ្លួនទទួលបាន។
ទន្ទឹមនឹងនេះ មានទំព័រហ្វេសប៊ុកមួយបានលើកឡើងថា ការចាក់វ៉ាក់សាំងយកកាត គឺជាការរៀបគម្រោងប្លន់អាយុជីវិតប្រជាជនខ្មែររបស់រដ្ឋាភិបាលលោក ហ៊ុន សែន តែប៉ុណ្ណោះ។
ទោះជាយ៉ាងណា ការត្រួតពិនិត្យការពិតរបស់ក្រុមការងារ Fact Crescendo Cambodia បានរកឃើញថា ការអះអាងនេះ គឺធ្វើឡើងមិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី១៨ ខែកក្កដា ឆ្នាំ២០២១ថ្មីៗកន្លងទៅនេះ មានទំព័រហ្វេសប៊ុកមួយឈ្មោះថា ស្លាបប៉ាកកាទេវរាជ បានបង្ហោះនូវវីដេអូឃ្លីបមួយ ដែលបាននិយាយអះអាងថា ការចាក់វ៉ាក់សាំង និងការយកកាត ឬប័ណ្ណសម្គាល់ គឺជាការរៀបគម្រោងប្លន់អាយុជីវិតប្រជាជនខ្មែររបស់រដ្ឋាភិបាលលោក ហ៊ុន សែន។
ទំព័រហ្វេសប៊ុកដដែលនេះ ក៏ធ្លាប់បានអះអាងនូវព័ត៌មានមិនត្រឹមត្រូវទាក់ទងទៅនឹងវ៉ាក់សាំងចិនស៊ីណូវ៉ាក់ ផងដែរ ដែលក្រុមការងាររបស់យើងបានធ្វើសេចក្តីរាយការណ៍កាលពីថ្ងៃទី២០ ខែកក្កដាកន្លងទៅនេះ។
វីដេអូឃ្លីប និងសំណេរខាងលើ មានអ្នកចូលទស្សនាដល់ទៅរាប់សែនដង មានការចែករំលែកតៗគ្នារាប់ម៉ឺនដង និងមានការចូលរួមបញ្ចេញមតិចម្រុះបែបពីសំណាក់អ្នកប្រើហ្វេសប៊ុកនិយាយភាសាខ្មែរផងដែរ។
រូបភាពផ្ដាមចេញពីទំព័រហ្វេសប៊ុក ដែលបានរៀបរាប់ថា «ការចាក់វ៉ាក់សាំងយកកាត គឺជាការរៀបគម្រោងប្លន់អាយុជីវិតប្រជាជនខ្មែររបស់រដ្ឋាភិបាលលោក ហ៊ុន សែន»។
ការត្រួតពិនិត្យការពិត
Fact Crescendo Cambodia បានចាប់ផ្ដើមអង្កេត និងផ្ទៀងផ្ទាល់លើការអះអាងមួយនេះ តាមរយៈត្រួតពិនិត្យទៅលើសេចក្តីរាយការណ៍របស់អង្គការសុខភាពពិភពលោក និងបណ្តាសារព័ត៌មានជាតិ ដែលនាំឲ្យរកឃើញនូវការពិតដូចខាងក្រោម។
កាលពីថ្ងៃទី២០ ខែកក្កដា ឆ្នាំ២០២១ អ្នកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានច្រានចោលការអះអាងនេះ និងលើកឡើងដោយម្ចាស់ទំព័រហ្វេសប៊ុក ស្លាបប៉ាកកាទេវរាជ ដែលបានបង្ហោះវីដេអូមួយកាលពីថ្ងៃទី១៨ ខែកក្កដា។
អ្នកស្រីបានបញ្ជាក់ថា «សូមបងប្អូនកុំជឿ នេះគឺល្បិចសម្រាប់ប្រមូលលុយ អ៊ីចឹងប្រសិនឃើញលេខប្លែក សូមកុំទាក់ទងឱ្យសោះ បើតេរកបងប្អូនបិទ ហើយបងប្អូនក៏មិនត្រូវទាក់ទង ហើយបញ្ជូនលុយទៅអាខោននេះដែរ»។ អ្នកស្រីបន្ដផងដែរថា គណៈកម្មការចំពោះកិច្ចចាក់វ៉ាក់សាំងការពារជំងឺកូវីដ-១៩ សូមច្រានចោលទាំងស្រុងចំពោះការផ្សាយហ្វេសប៊ុកឈ្មោះ ស្លាបប៉ាកកាទេវរាជ និងបានបញ្ជាក់ជាថ្មីថា យុទ្ធនាការនៃការចាក់វ៉ាក់សាំង គឺធ្វើឡើងដោយមិនគិតថ្លៃនោះទេ។
រូបភាពផ្តាមចេញពីវីដេអូផ្សាយផ្ទាល់ពីសកម្មភាពរបស់អ្នកស្រី ឱ វណ្ណឌីន ដែលបាននាំយកថវិកាចំនួន ១០លានរៀលជូនអ្នកចាក់វ៉ាក់សាំងទី ៦លាន។
ករណីមួយខាងលើនេះ ក៏ត្រូវបានផ្សព្វផ្សាយដោយសារព័ត៌មានជាច្រើនផងដែរ ដែលការអះអាងនេះត្រូវបានបដិសេធ និងបំភ្លឺដោយស្នងការនគរបាលខេត្តកោះកុង និងឪពុករបស់ម្ចាស់ទំព័រហ្វេសប៊ុក ស្លាបប៉ាកកាទេវរាជ ដែលបានចុះផ្សព្វផ្សាយដោយទំព័រហ្វេសប៊ុក BAYON Radio និងគេហទំព័រសារព័ត៌មាន កម្ពុជាថ្មី កាលពីថ្ងៃទី២១ ខែកក្កដា ឆ្នាំ២០២១។ លោក ទិត្យ សុផា ដែលត្រូវបានស្គាល់ថា គឺជាឪពុកនោះ បានបញ្ជាក់ និងអំពាវនាវដល់សាធារណៈជនយោគយល់ចំពោះទង្វើកូនរបស់ខ្លួនដែលមានជំងឺប្រសាទប្រចាំកាយ។
រូបភាពផ្តាមចេញពីទំព័រហ្វេសប៊ុក BAYON Radio ដែលបានសរសេររៀបរាប់ថា «ឪពុកម្ចាស់អាខោន ស្លាបប៉ាកកាទេវរាជ ចេញមុខសុំទោសរឿងកូនប្រុសគាត់បង្ហោះលើបណ្តាញសង្គមរិះគន់វ៉ាក់សាំងចិន»។
BAYON Radio Link | Archived Link
រូបភាពផ្តាមចេញពីគេហទំព័រសារព័ត៌មាន ដែលបានសរសេរចំណងជើងថា «ស្នងការនគរបាលខេត្តកោះកុង បំភ្លឺករណីហ្វេសប៊ុកឈ្មោះ ស្លាបប៉ាកាទេវរាជ រិះគន់ថា ចាក់វ៉ាក់សាំងជាគម្រោងប្លន់អាយុជីវិតប្រជាជន»។
Kampuchea Thmey’s Report | Archived Link
នៅក្នុងគេហទំព័រអង្គការសុខភាពពិភពលោក ក៏បានផ្សព្វផ្សាយ និងរាយការណ៍អំពីសារៈសំខាន់នៃការទទួលបានការចាក់វ៉ាក់សាំងការពារជំងឺឆ្លងកូវីដ-១៩មួយនេះ ដោយបានអំពាវនាវឲ្យប្រទេសទាំងអស់ធ្វើការចាក់វ៉ាក់សាំងទៅកាន់ប្រជាជនរបស់ខ្លួន។
រូបភាពផ្តាមចេញពីគេហទំព័រអង្គការសុខភាពពិភពលោក ដែលបានរៀបរាប់ជាភាសាអង់គ្លេសថា «We must ensure fair and equitable access to vaccines, and ensure every country receives them and can roll them out to protect their people, starting with the most vulnerable» ឬប្រើជាភាសាខ្មែរមានន័យថា «យើងត្រូវតែធានាឱ្យបាននូវការទទួលបានការចាក់វ៉ាក់សាំងដោយស្មើភាព និងធានាថាគ្រប់ប្រទេសទាំងអស់ ដែលទទួលបាន អាចជួយក្នុងការការពារអាយុជីវិតប្រជាជនរបស់ប្រទេសខ្លួន»។
សន្និដ្ឋាន
Fact Crescendo Cambodia បានរកឃើញថា ការអត្ថាធិប្បាយមួយនៅក្នុងវីដេអូឃ្លីបខាងលើនេះគឺ មិនត្រឹមត្រូវនោះឡើយ។ យុទ្ធនាការនៃការចាក់វ៉ាក់សាំងទៅដល់ប្រជាពលរដ្ឋរបស់រាជរដ្ឋាភិបាលកម្ពុជា គឺធ្វើឡើងដើម្បីទប់ស្កាត់ និងបង្ការជំងឺឆ្លងផ្លូវដង្ហើមកូវីដ-១៩ និងមិនគិតថ្លៃសេវានោះឡើយ។
Title:តើយុទ្ធនាការនៃការចាក់វ៉ាក់សាំងរបស់រាជរដ្ឋាភិបាលជាការប្លន់អាយុជីវិតប្រជាជនខ្មែរមែនទេ?
Fact Check By: Kakada SimResult: False
