សមាជិកក្រុមគ្រួសាររបស់លោកនាយករដ្ឋមន្ត្រី ហ៊ុន សែន តែងតែក្លាយជាផ្ទាំងស៊ីបនៃការរិះគន់ និងបញ្ចេញមតិមិនសមរម្យជារឿយៗ។ ក្នុងនោះ រូបថតមួយសន្លឹកបង្ហាញទិដ្ឋភាពលោក ហ៊ុន សាន និងលោកស្រី ហ៊ុន ស៊ីណាត ដែលត្រូវជាបងប្អូនបង្កើតរបស់លោកនាយករដ្ឋមន្ត្រី ត្រូវបានអ្នកប្រើប្រាស់បានអះអាងថាលោកទាំងពីរបានទទួលមរណភាពហើយ។ ការអះអាងនេះ ត្រូវបានប្រតិកម្មចម្រុះពីរង្វង់អ្នកប្រើប្រាស់ហ្វេសប៊ុកនិយាយភាសាខ្មែរជាច្រើន។
ទោះជាយ៉ាងណា ការត្រួតពិនិត្យ និងផ្ទៀងផ្ទាត់ការពិតរបស់ក្រុមការងារ Fact Crescendo Cambodia បានរកឃើញថាការអះអាងដោយអ្នកប្រើប្រាស់ហ្វេសប៊ុកបង្ហោះនៅលើបណ្តាញសង្គមនោះ គឺមិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី០៧ ខែឧសភា ឆ្នាំ២០២២កន្លងទៅថ្មីៗនេះ អ្នកប្រើប្រាស់ហ្វេសប៊ុកម្នាក់ បានបង្ហោះរូបថតមួយសន្លឹក បង្ហាញទិដ្ឋភាពលោក ហ៊ុន សាន និងលោកស្រី ហ៊ុន ស៊ីណាត ដែលត្រូវជាបងប្អូនបង្កើតរបស់លោក ហ៊ុន សែន ជាមួយនឹងការអះអាងថា លោកបានទទួលមរណភាពហើយ។ ដំណឹងមរណភាពនេះ បានបង្កើតឲ្យមានការចែករំលែកនៅលើបណ្តាញសង្គមហ្វេសប៊ុក ដោយមានការប្រតិកម្មចម្រុះ ពីសំណាក់អ្នកប្រើប្រាស់បណ្ដាញសង្គមហ្វេសប៊ុកនិយាយភាសាខ្មែរ។
ខាងក្រោមនេះ គឺជារូបភាពផ្តាមចេញពីប៉ុស្ដិ៍របស់អ្នកប្រើប្រាស់ហ្វេសប៊ុក ដោយបានរៀបរាប់ថា «ហ៊ុនណេង ទទួលមរណភាព នៅថ្ងៃព្រហស្បតិ៍ ០៥កើត ខែពិសាខ ឆ្នាំខាល ចត្វាស័ក. ព.ស២៥៦៥ ត្រូវនឹងថ្ងៃទី០៥ ខែឧសភា ឆ្នាំ២០២២ វេលាម៉ោង ៦:២៥នាទីល្ងាច ក្នុងជន្មាយុ ៧២ឆ្នាំ»។
ការត្រួតពិនិត្យការពិត
Fact Crescendo Cambodia ចាប់ផ្ដើមត្រួតពិនិត្យ និងផ្ទៀងផ្ទាត់ទៅលើព័ត៌មានអះអាងខាងលើនេះ តាមរយៈព័ត៌មានថ្មីចុងក្រោយ និងការបំភ្លឺបកស្រាយរបស់ក្រុមគ្រួសារដោយផ្ទាល់។
ដំណឹងមរណភាពរបស់ក្រុមគ្រួសារមេដឹកនាំប្រទេស គួរតែត្រូវបានប្រកាសជាផ្លូវការដោយស្ថាប័នរដ្ឋាភិបាល និងប្រព័ន្ធផ្សព្វផ្សាយរដ្ឋ និងឯកជន និងតាមមធ្យោបាយនៃការផ្សព្វផ្សាយសំខាន់ៗដទៃទៀត។
តាមរយៈទំព័រហ្វេសប៊ុករបស់លោកស្រី ហ៊ុន ស៊ីណាត បង្ហោះកាលពីថ្ងៃទី១៩ ខែឧសភា ឆ្នាំ២០២២កន្លងទៅនេះ បានបង្ហាញទិដ្ឋភាពនៃការអញ្ជើញទៅសួរសុខទុក្ខបងប្រុសរបស់លោកស្រី គឺលោក ហ៊ុន សាន ដែលបានសម្រាកព្យាបាលនៅក្នុងមន្ទីរពេទ្យមួយ ក្នុងរាជធានីបាងកក ប្រទេសថៃ។ ខាងក្រោមនេះ គឺជារូបភាពផ្តាមចេញពីទំព័រហ្វេសប៊ុកខាងលើ បានសរសេររៀបរាប់ថា «ថ្ងៃនេះបងប្រុសកាន់តែស្រស់ស្រាយហើយ 🙏 សូមជូនពរដល់បងប្រុសឆាប់ជាសៈស្បើយ»។
ខាងក្រោមនេះ គឺជារូបថតបង្ហាញទិដ្ឋភាពរបស់លោកស្រី ហ៊ុន ស៊ីណាត បានអញ្ជើញទៅសួរសុខទុក្ខលោក ហ៊ុន សាន នៅឯទីក្រុងបាងកក ប្រទេសថៃ។
ដូចគ្នានេះ លោកស្រី ហ៊ុន ស៊ីណាត ក៏បានបង្ហាញវត្តមានចូលរួមជាសាធារណៈក្នុងពិធីសម្ភោធក្រុមហ៊ុន ម៉ាដាមស្អាត និងកាត់ខ្សែបូរដើម្បីដំណើរជាផ្លូវការកាលពីព្រឹកថ្ងៃទី២៤ ខែឧសភា ឆ្នាំ២០២២កន្លងទៅថ្មីៗនេះផងដែរ។
ក្រុមការងាររបស់ Fact Crescendo Cambodia ក៏បានស្វែងរកការបំភ្លឺបន្ថែមជាមួយនឹងលោកស្រី ហ៊ុន ស៊ីណាត ផ្ទាល់។ លោកស្រីបានច្រានចោលការអះអាងនៅលើបណ្ដាញសង្គម ដោយបាននិយាយថា ស្ថានភាពសុខភាពរបស់លោក ហ៊ុន សាន បានធូរស្រាលច្រើន និងបានត្រឡប់មកកាន់គេហដ្ឋានវិញហើយកាលពីថ្ងៃទី២៤ ខែឧសភា ឆ្នាំ២០២២នេះ។ លោកស្រីក៏បានបញ្ជាក់បន្ថែមថា សុខភាពរបស់លោកស្រី គឺល្អ ពុំមានបញ្ហាអ្វីនោះឡើយ។
ដោយឡែកលោក ហ៊ុន ណេង ដែលជាមន្ត្រីជើងចាស់មួយរូបរបស់គណបក្សប្រជាជនកម្ពុជា និងជាបងប្រុសបង្កើតរបស់លោកនាយករដ្ឋមន្ត្រី ហ៊ុន សែន បានទទួលមរណភាពកាលពីថ្ងៃទី០៥ ខែឧសភា ឆ្នាំ២០២២កន្លងទៅ ក្នុងជន្មាយុ ៧៣ឆ្នាំ។ លោកជាកូនទី២ ក្នុងចំណោមបងប្អូន ៦នាក់ ដោយមានលោក ហ៊ុន សាន ជាបងប្រុសច្បង, លោក ហ៊ុន សែន, លោកស្រី ហ៊ុន សេងនី, លោកស្រី ហ៊ុន ស៊ីណាត និងលោកស្រី ហ៊ុន ប៊ុនធឿន។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News
សន្និដ្ឋាន
Fact Crescendo Cambodia រកឃើញថារូបថត និងការអះអាងដោយអ្នកប្រើប្រាស់ហ្វេសប៊ុកខាងលើនោះ គឺពិតជាមិនត្រឹមត្រូវនោះឡើយ។ បងប្រុសច្បងរបស់លោកនាយករដ្ឋមន្ត្រីកម្ពុជាលោក ហ៊ុន សាន គឺរស់រានមានជីវិតនៅឡើយទេ ដោយស្ថានភាពជំងឺរបស់លោកក៏បានធូរស្រាលច្រើន និងបានត្រឡប់មកពីសម្រាកព្យាបាលនៅក្នុងមន្ទីរពេទ្យ នាទីក្រុងបាងកក ទៅកាន់គេហដ្ឋានវិញហើយ។ ចំណែកលោកស្រី ហ៊ុន ស៊ីណាត មានសុខភាពល្អធម្មតា ហើយមិនបានទទួលមរណភាព ដូចដែលបានអះអាងនោះឡើយ។
Title:បងប្រុស និងប្អូនស្រីលោក ហ៊ុន សែន នៅរស់រានមានជីវិតដូចធម្មតាខុសពីការអះអាង
Fact Check By: Kakada SimResult: False
